અમદાવાદમાં ટ્રાફિક સમસ્યા અને માર્ગ સુરક્ષાના મુદ્દે હાઇકોર્ટ નારાજ; ચાલુ વાહને વીડિયો કૉલ અને મોબાઇલમાં મૂવી જોતા ડ્રાઇવિંગ થતું હોવા અંગે ચિંતા વ્યક્ત કરી
અમદાવાદ: શહેરમાં બગડતી ટ્રાફિક વ્યવસ્થા અને માર્ગ સુરક્ષાના મુદ્દે ગુજરાત હાઇકોર્ટમાં યોજાયેલી સુઓમોટો સુનાવણી દરમિયાન અદાલતે રાજ્ય સરકાર અને પોલીસ તંત્રની કામગીરી અંગે ગંભીર સવાલો ઉઠાવ્યા હતા. પાંજરાપોળ ચાર રસ્તા પાસે નિર્માણાધીન ફ્લાયઓવર અને ત્યાં સર્જાતી ટ્રાફિક સમસ્યાને લઈને પણ કોર્ટે જવાબદારી નક્કી કરવા પર ભાર મૂક્યો હતો.
સુનાવણી દરમિયાન હેલ્મેટના નિયમોના અમલ અંગે ટકોર કરતાં કોર્ટે જણાવ્યું હતું કે, ટુ-વ્હીલર ચાલકો અને પાછળ બેસનારાઓની સુરક્ષા માટે નિયમોનું કડક પાલન જરૂરી છે. માર્ગ અકસ્માતોમાં હેલ્મેટના અભાવે જીવ ગુમાવવાના બનાવો ચિંતાજનક છે. સાથે જ નંબર પ્લેટ વગર દોડતાં ડમ્પરો અને બેફામ વાહનચાલન સામે પણ અસરકારક કાર્યવાહી થવી જોઈએ.
હાઇકોર્ટે ચાલુ વાહને મોબાઇલ પર વાત કરવી, વીડિયો કૉલ કરવો તેમજ કારમાં મોબાઇલ પર મૂવી જોતા ડ્રાઇવિંગ કરવા જેવી જોખમી પ્રવૃત્તિઓ અંગે નારાજગી વ્યક્ત કરી હતી. આવી બેદરકારી માત્ર વાહનચાલક જ નહીં, પરંતુ રસ્તા પર ચાલતા અન્ય લોકોના જીવને પણ જોખમમાં મૂકે છે. આ પરિસ્થિતિમાં ટ્રાફિક પોલીસ દ્વારા નિયમોનો કડક અમલ થાય તે જરૂરી હોવાનું કોર્ટે ભારપૂર્વક જણાવ્યું હતું.
સુનાવણી દરમિયાન રાજ્ય સરકારે ટ્રાફિક વ્યવસ્થાને સુધારવા માટે લેવામાં આવેલા પગલાં અંગે સોગંદનામું રજૂ કર્યું હતું. સરકારી પક્ષે જણાવ્યું હતું કે, શહેરોમાં ટ્રાફિક નિયંત્રણ માટે 650 નવા ટ્રાફિક જવાનોની ભરતી કરવામાં આવી છે. ઉપરાંત, ટ્રાફિક બ્રિગેડના જવાનોને 30 દિવસની વિશેષ તાલીમ આપીને ટ્રાફિક નિયમન માટે તૈનાત કરવાની યોજના છે.
હવે હાઇકોર્ટની ટકોર બાદ હેલ્મેટ, નંબર પ્લેટ, મોબાઇલના ઉપયોગ અને અન્ય ટ્રાફિક નિયમોના અમલ માટે તંત્ર કેવાં પગલાં લે છે તેના પર સૌની નજર રહેશે.
