રાજકોટના નિરંજન શાહ સ્ટેડિયમમાં છત્તીસગઢ સામે સૌરાષ્ટ્રની પ્રથમ ટક્કર; જયદેવ ઉનડકટ ટીમનું નેતૃત્વ કરશે
રાજકોટ: ભારતીય ક્રિકેટ ટીમના અનુભવી ઓલરાઉન્ડર રવીન્દ્ર જાડેજાને રણજી ટ્રોફી માટે સૌરાષ્ટ્રની 16 સભ્યોની ટીમમાં સામેલ કરવામાં આવ્યા છે. સૌરાષ્ટ્રની ટીમ પોતાની પ્રથમ મેચમાં છત્તીસગઢ સામે મેદાનમાં ઉતરશે. ટીમની કમાન ઝડપી બોલર જયદેવ ઉનડકટને સોંપવામાં આવી છે.
રણજી ટ્રોફીમાં રમવાથી જાડેજાને આગામી ટેસ્ટ ક્રિકેટ માટે પોતાની તૈયારી મજબૂત કરવાની તક મળશે. સૌરાષ્ટ્રની ટીમ રાજકોટના નિરંજન શાહ સ્ટેડિયમમાં પોતાના અભિયાનની શરૂઆત કરશે. ટીમમાં અનુભવી ખેલાડીઓની સાથે ઝડપી બોલર નીલ પંડ્યા અને ઓલરાઉન્ડર અર્થ યાદવ જેવા નવા ચહેરાઓને પણ સ્થાન મળ્યું છે.
ટીમમાં હાર્વિક દેસાઈ વિકેટકીપરની ભૂમિકા ભજવશે, જ્યારે અર્પિત વાસવડા, ચિરાગ જાની અને જય ગોહિલ બેટિંગ વિભાગને મજબૂતી આપશે. ઝડપી બોલિંગમાં જયદેવ ઉનડકટ અને ચેતન સકારિયા મહત્વની જવાબદારી સંભાળશે, જ્યારે સ્પિન બોલિંગમાં પાર્થ ભુટ પર પસંદગીકારોએ વિશ્વાસ મૂક્યો છે.
સૌરાષ્ટ્રની 16 સભ્યોની ટીમ: જયદેવ ઉનડકટ (કપ્તાન), રવીન્દ્ર જાડેજા, હાર્વિક દેસાઈ (વિકેટકીપર), અર્પિત વાસવડા, ચિરાગ જાની, પ્રેરક માંકડ, જય ગોહિલ, ચેતન સકારિયા, અંકુર પંવાર, સમર ગજ્જર, પાર્થ ભુટ, વિશ્વરાજસિંહ જાડેજા, હેતવિક કોટક, નીલ પંડ્યા, અર્થ યાદવ અને તરંગ ગોહેલ.
