જૂની સિસ્ટમવાળા SBI અને બેંક ઓફ બરોડાના ATMને બનાવતા નિશાન; ડિસ્પેન્સર બોક્સમાં એલ્યુમિનિયમની પટ્ટી ફસાવી રોકડ સેરવવાની મોડસ ઓપરેન્ડી, રાજ્યનાં અનેક શહેરોમાં ચોરી કર્યાની કબૂલાત
રાજકોટ સહિત ગુજરાતના વિવિધ શહેરો અને મુંબઈમાં ATM મશીન સાથે છેડછાડ કરીને રોકડની ચોરી કરતી ગેંગનો રાજકોટ ક્રાઈમ બ્રાન્ચે પર્દાફાશ કર્યો છે. પોલીસે ઉત્તર પ્રદેશના પ્રતાપગઢના ત્રણ શખ્સોને ઝડપી પાડી તેમની પાસેથી ₹1.12 લાખ રોકડા, કાર, મોબાઈલ ફોન, એલ્યુમિનિયમની પટ્ટીઓ, ફાઈબરની રિંગ, બ્લેન્ડર ફાઈલ અને બેંક ઓફ બરોડાનું ATM કાર્ડ સહિત કુલ ₹4.45 લાખનો મુદ્દામાલ કબજે કર્યો છે.
પોલીસ કમિશનર બ્રજેશકુમાર ઝા, એડિશનલ પોલીસ કમિશનર ચૈતન્ય મંડલીક, DCP (ક્રાઈમ) જગદીશ બાંગરવા અને ACP (ક્રાઈમ) બી.બી. બસિયાની સૂચના હેઠળ મિલકત સંબંધી ગુનાઓ શોધવા માટે ક્રાઈમ બ્રાન્ચની ટીમ તપાસ કરી રહી હતી. આ દરમિયાન મળેલી બાતમીના આધારે PSI ડી.પી. ઝાલા અને એસ.એમ. રાણાની ટીમે પુજારા પ્લોટ વિસ્તારમાં કાંતા વિકાસગૃહ પાછળની શેરીમાંથી ત્રણ શંકાસ્પદ શખ્સોને ઝડપી લીધા હતા.
પકડાયેલા આરોપીઓમાં અફસારઅહમદ રિયાસતઅલી (ઉં.વ. 23), અરબાઝ ફૈયાઝઅહમદ (ઉં.વ. 27) અને સાહિદખાન મોહમદસલીમ (ઉં.વ. 26)નો સમાવેશ થાય છે. ત્રણેય આરોપીઓ ઉત્તર પ્રદેશના પ્રતાપગઢના રહેવાસી હોવાનું પોલીસે જણાવ્યું છે.
જૂની ટેક્નોલોજીવાળા ATMને બનાવતા સોફ્ટ ટાર્ગેટ
પોલીસ સૂત્રોના જણાવ્યા અનુસાર, આરોપીઓ સ્ટેટ બેંક ઓફ ઈન્ડિયા (SBI) અને બેંક ઓફ બરોડાનાં જૂની સિસ્ટમવાળા ATMને નિશાન બનાવતા હતા. આ મશીનોમાં છેડછાડ થાય ત્યારે સાયરન ન વાગતો હોવાનો લાભ લઈને આરોપીઓ ચોરીને અંજામ આપતા હતા.
એલ્યુમિનિયમની પટ્ટીથી રોકડ ફસાવવાની તરકીબ
આરોપીઓ બેંકમાં રજા હોય અથવા બેંક બંધ હોય તેવા સમયે ATMની રેકી કરતા હતા. ATMમાં કોઈ વ્યક્તિ હાજર ન હોય ત્યારે તેઓ મશીનના ડિસ્પેન્સર બોક્સમાં એલ્યુમિનિયમની પટ્ટી ફિટ કરી ત્યાંથી નીકળી જતા હતા.
ત્યારબાદ કોઈ ગ્રાહક ATMમાંથી રોકડ ઉપાડવાની પ્રક્રિયા પૂર્ણ કરે, પરંતુ પટ્ટીના કારણે પૈસા બહાર ન આવે તો ગ્રાહક નિરાશ થઈને ત્યાંથી જતો રહેતો હતો. ગ્રાહક ગયા બાદ આરોપીઓ ફરી ATMમાં પ્રવેશ કરીને ડિસ્પેન્સર બોક્સમાં ફસાયેલા પૈસા કાઢી લેતા હતા. આ રીતે તેઓ બેંકના ATMમાંથી રોકડ સેરવી લેતા હોવાની વિગતો સામે આવી છે.
રાજકોટથી સુરત, અમદાવાદ અને મુંબઈ સુધી ચોરીની કબૂલાત
પોલીસના જણાવ્યા અનુસાર, પકડાયેલા આરોપીઓએ પૂછપરછ દરમિયાન અનેક સ્થળોએ ATMમાંથી રોકડ ચોરી કર્યાની કબૂલાત આપી છે. તેમાં સુરતના સચિન GIDC, પ્રાણી સંગ્રહાલય અને ઉધના વિસ્તાર ઉપરાંત અમદાવાદના નારોલ, સરખેજ, છત્રાલ અને રિંગ રોડ બાયપાસ વિસ્તારનો સમાવેશ થાય છે.
આ ઉપરાંત મહેસાણામાં રેલવે સ્ટેશન નજીકના ATM, મુંબઈના ઈસ્ટ વિસ્તાર અને સુરતના અડાજણ પાટિયા વિસ્તારમાં પણ ચોરી કર્યાની કબૂલાત આપી હોવાનું જણાવાયું છે. રાજકોટમાં ત્રિકોણ બાગ નજીક આવેલા SBIના ATMમાંથી આશરે ₹20 હજાર કાઢી લીધા હોવાની પણ આરોપીઓએ કબૂલાત આપી હોવાનું પોલીસ સૂત્રોએ જણાવ્યું છે.
આરોપીઓએ અલગ-અલગ સ્થળોએ હજારો રૂપિયાથી લઈને આશરે એક લાખ રૂપિયા સુધીની રોકડ ચોરી કર્યાની વિગતો આપી હોવાનું સામે આવ્યું છે. જોકે, તમામ ઘટનાઓમાં તેમની સંડોવણી અને ચોરીની કુલ રકમની પુષ્ટિ તપાસ બાદ જ સ્પષ્ટ થશે.
ક્રાઈમ બ્રાન્ચે આરોપીઓ પાસેથી કુલ ₹4.45 લાખનો મુદ્દામાલ કબજે કરી વધુ કાયદેસરની કાર્યવાહી હાથ ધરી છે. આ ગેંગ દ્વારા અન્ય કયા સ્થળોએ ચોરી કરવામાં આવી છે અને તેમાં અન્ય કોઈની સંડોવણી છે કે કેમ તે દિશામાં પણ તપાસ હાથ ધરવામાં આવી શકે છે.
