દિવાળીના તહેવારો દરમિયાન વતન જતાં મુસાફરોને અવરજવરમાં મુશ્કેલી ન પડે તે માટે ગુજરાત રાજ્ય માર્ગ વાહનવ્યવહાર નિગમ (GSRTC) દ્વારા વિશેષ આયોજન કરવામાં આવ્યું છે. તહેવારોમાં વધતા મુસાફરોના ધસારાને પહોંચી વળવા રાજ્યભરના વિવિધ ડિવિઝનમાંથી 3,500થી 4,000 જેટલી વધારાની બસો દોડાવવાનું આયોજન છે. રાજકોટ વિભાગ દ્વારા પણ 100થી વધુ એક્સ્ટ્રા બસો દોડાવવાની તૈયારી કરવામાં આવી છે.
સુરતથી સૌરાષ્ટ્ર અને ઉત્તર ગુજરાત માટે વિશેષ વ્યવસ્થા
સુરત શહેરમાં વસતા સૌરાષ્ટ્ર, ઉત્તર ગુજરાત અને પંચમહાલ વિસ્તારના લોકોને દિવાળી દરમિયાન પોતાના વતન પહોંચવામાં સરળતા રહે તે માટે સુરત ST વિભાગ દ્વારા 4થી 7 નવેમ્બર દરમિયાન અંદાજે 1,600 એક્સ્ટ્રા બસો દોડાવવાનું આયોજન કરાયું છે. આ બસોનો લાભ ખાસ કરીને રત્નકલાકારો અને શ્રમિકોને મળશે.
સાંજે 4થી રાત્રે 10 વાગ્યા સુધી બસો દોડશે
આ વિશેષ બસો સાંજે 4થી રાત્રે 10 વાગ્યા દરમિયાન સંચાલિત કરવામાં આવશે. મુસાફરો અગાઉથી ટિકિટ બુક કરાવી શકશે તેમજ ગ્રુપ બુકિંગની સુવિધા પણ ઉપલબ્ધ રહેશે. બસો કીમ ચોકડીથી ભારતમાલા હાઈવે મારફતે દોડાવવામાં આવનાર હોવાથી મુસાફરીના સમયમાં બચત થવાની અપેક્ષા છે.
આખી બસનું ગ્રુપ બુકિંગ કરાવનાર મુસાફરોને ‘ST આપના દ્વારે’ યોજના હેઠળ સોસાયટીથી સીધા વતન સુધી પહોંચાડવાની સુવિધા પણ આપવામાં આવશે.
બુકિંગ માટે વિવિધ બસ સ્ટેશનો પર વ્યવસ્થા
4થી 7 નવેમ્બર દરમિયાન ઉપડનારી એક્સ્ટ્રા બસોનું ગ્રુપ બુકિંગ સુરત સેન્ટ્રલ બસ સ્ટેશન અને અડાજણ બસ પોર્ટ ખાતેના સુરત સિટી ડેપો પરથી કરાવી શકાશે. એડવાન્સ ટિકિટ બુકિંગ માટે સુરત સેન્ટ્રલ બસ સ્ટેશન, અડાજણ, ઉધના, કામરેજ અને કડોદરા સહિતના બસ સ્ટેશનો પર વ્યવસ્થા રહેશે. આ ઉપરાંત ST નિગમના અન્ય બસ સ્ટેશનો, અધિકૃત બુકિંગ એજન્ટો, મોબાઇલ એપ અને સત્તાવાર વેબસાઇટ દ્વારા પણ ટિકિટ બુક કરાવી શકાશે.
સૌરાષ્ટ્ર અને પંચમહાલ માટે અલગ પ્રસ્થાન સ્થળો
સૌરાષ્ટ્ર તરફ જતી વધારાની બસોનું સંચાલન ધારૂકા કોલેજ અને વરાછા રોડ ખાતેના મેદાનમાંથી કરવામાં આવશે. જ્યારે દાહોદ, ગોધરા, ઝાલોદ અને પંચમહાલ તરફ જતી બસો સુરત સેન્ટ્રલ બસ સ્ટેશન સામેના સિટી સ્ટેન્ડ તેમજ રામનગર ખાતેથી ઉપડશે. આ તમામ બસો 4થી 7 નવેમ્બર દરમિયાન સાંજે 4થી રાત્રે 10 વાગ્યા સુધી દોડાવવાનું આયોજન છે.
લાભ પાંચમ સુધી વધારાની બસો ચાલુ રહેશે
દિવાળી બાદ પણ મુસાફરોનો ધસારો રહેવાની શક્યતાને ધ્યાનમાં રાખીને 8થી 15 નવેમ્બર, એટલે કે લાભ પાંચમ સુધી સુરત સેન્ટ્રલ બસ સ્ટેશનથી વડોદરા અને અમદાવાદ તરફ વધારાની બસો દોડાવવાનું આયોજન કરવામાં આવ્યું છે. ST નિગમના આ આયોજનથી તહેવારો દરમિયાન વતન જવા ઇચ્છતા મુસાફરોને વધુ પરિવહન સુવિધા મળવાની અપેક્ષા છે.
