મુંબઈ-અમદાવાદ હાઈસ્પીડ રેલ કોરિડોર પ્રોજેક્ટ અંતર્ગત વડોદરા ખાતે મહત્ત્વપૂર્ણ એન્જિનિયરિંગ કામગીરી પૂર્ણ કરવામાં આવી છે. દિલ્હી-મુંબઈ રાજધાનીની મુખ્ય રેલવે લાઇન પર તમામ 14 પોર્ટલ બીમ સ્થાપિત કરવાની કામગીરી સફળતાપૂર્વક પૂરી થઈ છે. આ સિદ્ધિથી બુલેટ ટ્રેનના વાયાડક્ટના નિર્માણકાર્યને આગળ વધારવાનો માર્ગ મોકળો થયો છે.
વ્યસ્ત રેલવે નેટવર્ક વચ્ચે પડકારજનક કામગીરી
વડોદરા વિસ્તારમાં બુલેટ ટ્રેન કોરિડોરનો આ ભાગ અંદાજે 8.3 કિલોમીટર લાંબો છે. ગીચ વસ્તીવાળા વિસ્તારો અને વ્યસ્ત રેલવે નેટવર્કમાંથી પસાર થતો આ માર્ગ એન્જિનિયરિંગની દૃષ્ટિએ પડકારજનક છે. અહીં હાઈસ્પીડ રેલ કોરિડોરને ભારતીય રેલવેની કુલ પાંચ લાઇનો ક્રોસ કરવાની થાય છે.
ખાસ કરીને બુલેટ ટ્રેનનો માર્ગ દિલ્હી-મુંબઈ રાજધાનીની મુખ્ય લાઇનને ત્રાંસી દિશામાં ક્રોસ કરે છે. આથી રેલવે ટ્રાફિકને અસર ન થાય અને દોડતી ટ્રેનો માટે જરૂરી સલામતીનું અંતર જળવાઈ રહે તે માટે વિશેષ ડિઝાઇન ધરાવતા પોર્ટલ બીમ તૈયાર કરવામાં આવ્યા છે.
વડોદરામાં બે સ્થળો વચ્ચે 14 પોર્ટલ બીમ સ્થાપિત
પ્રોજેક્ટની વિગતો મુજબ, વડોદરા બુલેટ ટ્રેન સ્ટેશન અને વિશ્વામિત્રી રેલવે સ્ટેશન વચ્ચે 10 પોર્ટલ બીમ સ્થાપિત કરવામાં આવ્યા છે. જ્યારે વડોદરા રેલવે સ્ટેશન અને છાયાપુરી રેલવે સ્ટેશન વચ્ચે વધુ ચાર પોર્ટલ બીમ મૂકવામાં આવ્યા છે. આ તમામ બીમના સ્થાપન સાથે આ સ્થળેનું જટિલ માળખાકીય કામ પૂર્ણ થયું છે.
હવે રાજધાની મેઇન લાઇનના ક્રોસિંગ પર આશરે 40 મીટર લાંબા કમ્પોઝિટ ગર્ડર્સ મૂકવાની કામગીરી આગળ વધશે. કોરિડોરના અન્ય ભાગોમાં સ્પાન-બાય-સ્પાન (SBS) ટેક્નોલોજીનો ઉપયોગ કરીને વાયાડક્ટનું નિર્માણ કરવામાં આવશે.
દરેક પોર્ટલ બીમનું વજન આશરે 1,500 ટન
વડોદરાના વ્યસ્ત રેલવે વિસ્તારમાં મર્યાદિત જગ્યા અને સતત ટ્રેન વ્યવહારને કારણે સામાન્ય પ્રીકાસ્ટ લોન્ચિંગ પદ્ધતિ અપનાવવી મુશ્કેલ હતી. તેથી પોર્ટલ બીમનું નિર્માણ સ્થળ પર જ કોંક્રિટ કાસ્ટિંગ પદ્ધતિથી કરવામાં આવ્યું હતું. તૈયાર થયેલા દરેક પોર્ટલ બીમનું વજન આશરે 1,500 ટન જેટલું હોવાનું જણાવાયું છે.
આટલી ભારે રચનાઓનું નિર્માણ અને સ્થાપન અત્યંત ચોકસાઈ, આયોજન અને સલામતીના કડક ધોરણો સાથે કરવામાં આવ્યું છે. તમામ 14 પોર્ટલ બીમનું કામ પૂર્ણ થતાં મુંબઈ-અમદાવાદ બુલેટ ટ્રેન પ્રોજેક્ટના વડોદરા વિભાગમાં વાયાડક્ટ નિર્માણની કામગીરીને આગળ વધારવા માટે મહત્ત્વપૂર્ણ આધાર મળ્યો છે.
