તુવેરદાળના ભાવમાં કિલોએ રૂ.30નો વધારો થતાં ભાવ રૂ.160થી 180 સુધી પહોંચ્યા, રાજકોટમાં સિંગતેલના ડબ્બે ત્રણ દિવસમાં રૂ.75નો વધારો
જીવનજરૂરી ખાદ્યચીજોના સતત વધતા ભાવથી સામાન્ય જનતાનું બજેટ ખોરવાઈ રહ્યું છે. હવે તુવેરદાળના ભાવમાં તોતિંગ વધારો નોંધાયો છે. એક વર્ષ કરતાં ઓછા સમયમાં તુવેરદાળના ભાવમાં આશરે 50 ટકાનો ઉછાળો આવ્યો છે. તાજેતરમાં પ્રતિ કિલોએ રૂ.30નો વધારો થતાં તુવેરદાળના ભાવ રૂ.160થી રૂ.180 સુધી પહોંચી ગયા છે, જે અગાઉ આશરે રૂ.130 હતા.
ગુજરાતમાં તુવેરનું વાવેતર સામાન્ય રીતે 2.56 લાખ હેક્ટર વિસ્તારમાં થાય છે, જ્યારે ગત વર્ષે 3.10 લાખ હેક્ટર અને ચાલુ વર્ષે 11 ઓક્ટોબર સુધીમાં 3.37 લાખ હેક્ટરમાં વાવેતર નોંધાયું છે. આમ, સામાન્ય વાવેતરની સરખામણીએ 31 ટકાનો વધારો થયો છે. તેમ છતાં દાળના ભાવમાં સતત વધારો થતાં ભાવવધારા પાછળ સંગ્રહખોરી કે નફાખોરીની ભૂમિકા હોવાની આશંકા વ્યક્ત થઈ રહી છે.
દેશમાં પણ તુવેરના ઉત્પાદનના આંકડા વચ્ચે ભાવવધારાએ ગ્રાહકોની ચિંતા વધારી છે. વર્ષ 2024-25માં દેશમાં તુવેરનું ઉત્પાદન 36.24 લાખ ટન અને વર્ષ 2025-26માં 35.92 લાખ ટન નોંધાયું હતું. બીજી તરફ, જથ્થાબંધ બજારમાં તુવેરના ભાવમાં સતત વધઘટ જોવા મળી રહી છે. ગત વર્ષે નવરાત્રિથી દિવાળી દરમિયાન પ્રતિ 20 કિલોના રૂ.900થી રૂ.1,300 સુધીના ભાવ હતા. ત્યારબાદ ભાવમાં વધારો થતાં સપ્ટેમ્બર 2026ના અંતે રૂ.1,200થી રૂ.1,725ની સપાટી જોવા મળી હતી. હવે ભાવ રૂ.2,000ને પાર પહોંચતા ગ્રાહકો પર મોંઘવારીનો વધુ બોજ પડ્યો છે.
ખાદ્યચીજોના ભાવમાં સતત થઈ રહેલો વધારો ભાવનિયંત્રણના પગલાં સામે સવાલો ઊભા કરે છે. ઉત્પાદન અને વાવેતરના આંકડાઓ વચ્ચે છૂટક બજારમાં ભાવ કેમ વધી રહ્યા છે તે અંગે અસરકારક તપાસ અને દેખરેખની જરૂરિયાત અનુભવાઈ રહી છે.
સિંગતેલના ડબ્બે ત્રણ દિવસમાં રૂ.75નો વધારો
તુવેરદાળની સાથે ખાદ્યતેલના ભાવમાં પણ તેજી જોવા મળી રહી છે. સૌરાષ્ટ્રમાં સિંગતેલના ડબ્બે વધુ રૂ.20નો વધારો નોંધાયો છે. છેલ્લા ત્રણ દિવસમાં કુલ રૂ.75નો વધારો થતાં ગ્રાહકોને મોંઘવારીનો વધુ માર સહન કરવો પડી રહ્યો છે.
રાજકોટમાં સિંગતેલના ભાવ વધીને રૂ.2,935થી રૂ.2,985 સુધી પહોંચ્યા છે, જે આ વર્ષની ઊંચી સપાટી ગણાય છે. બીજી તરફ, સૂર્યમુખી તેલના ભાવમાં પણ વધારો નોંધાયો છે. અગાઉ રૂ.2,505થી રૂ.2,535ના ભાવે વેચાતું સૂર્યમુખી તેલ હવે રૂ.2,565થી રૂ.2,595 સુધી પહોંચ્યું છે.
એક તરફ દાળ અને બીજી તરફ ખાદ્યતેલના ભાવમાં વધારો થતાં ઘરખર્ચમાં વધારો થઈ રહ્યો છે. ત્યારે ભાવવધારા પર નિયંત્રણ લાવવા અને સંગ્રહખોરી કે ગેરરીતિ થતી હોય તો તેની સામે કાર્યવાહી કરવા તંત્રની ભૂમિકા મહત્ત્વપૂર્ણ બની છે.
