ભરૂચમાં જામા મસ્જિદ અને પ્રાચીન જૈન સમરી વિહારને લઈને ચાલી રહેલો વિવાદ હવે ગુજરાત હાઈકોર્ટ સુધી પહોંચ્યો છે. આ સ્થળના ઐતિહાસિક અને ધાર્મિક મહત્ત્વ અંગે કરવામાં આવેલા દાવાઓ વચ્ચે મંગળવારે વધુ સુનાવણી હાથ ધરાવાની છે. બીજી તરફ, વિવાદને ધ્યાનમાં રાખીને મસ્જિદની અંદર અને બહાર મળીને 25 CCTV કેમેરા ગોઠવવામાં આવ્યા હોવાની માહિતી સામે આવી છે.
ભગવાન મલ્લિનાથ અને ગણેશજીની પ્રતિમાની સુરક્ષાનો મુદ્દો ઉઠાવાશે
સૂત્રોના જણાવ્યા અનુસાર, હાઈકોર્ટમાં થનારી સુનાવણી દરમિયાન મસ્જિદના પિલરો પર જોવા મળતી દેવી-દેવતાઓની કોતરણી તેમજ જૈન તીર્થંકર ભગવાન મલ્લિનાથ અને ભગવાન ગણેશજીની પ્રતિમાની સુરક્ષાનો મુદ્દો રજૂ થઈ શકે છે. આ ઉપરાંત ધાર્મિક પૂજા-પાઠની મંજૂરી અંગે પણ રજૂઆત થવાની સંભાવના છે.
પાછળનો પ્રવેશદ્વાર બંધ કરાયો હોવાનો દાવો
આ વિવાદ વચ્ચે સ્થળનો પાછળનો મુખ્ય પ્રવેશદ્વાર આશરે 700 વર્ષના ઇતિહાસમાં પ્રથમ વખત બંધ કરવામાં આવ્યો હોવાનો દાવો કરવામાં આવ્યો છે. પુરાતત્ત્વ વિભાગની મિલકતમાં થતી દફનવિધિ બંધ કરાવવા અને સ્થળ પર દેખરેખ રાખવા માટે એક અધિકારીને સતત ફરજ પર રાખવામાં આવ્યા હોવાની પણ માહિતી છે.
છેલ્લા એક વર્ષથી આ મુદ્દે વિવાદ અને વિવિધ ધાર્મિક કાર્યક્રમોને કારણે સ્થળ ચર્ચામાં રહ્યું છે. મસ્જિદમાં શુક્રવારની નમાઝ માટે આવતા મુસ્લિમ બિરાદરો ઉપરાંત જૈન સમાજના શ્રદ્ધાળુઓની હાજરીમાં પણ વધારો થતો હોવાનો દાવો કરવામાં આવ્યો છે. આ કેસમાં મસ્જિદ ટ્રસ્ટને પણ પક્ષકાર બનાવવામાં આવ્યું છે અને આગામી સુનાવણીમાં ટ્રસ્ટના વકીલ રજૂઆત કરે તેવી શક્યતા છે.
પ્રાચીન પાતાળ કૂવાને લઈને પણ અનેક દાવા
જામા મસ્જિદ પરિસરમાં આવેલા પ્રાચીન પાતાળ કૂવાને લઈને પણ ચર્ચા ચાલી રહી છે. આ કૂવામાં જૈન અને સનાતન ધર્મ સાથે જોડાયેલી પ્રતિમાઓ તથા ધાર્મિક ગ્રંથો હોવાની અટકળો વ્યક્ત કરવામાં આવી રહી છે. જોકે, આ દાવાઓની સત્તાવાર પુષ્ટિ થઈ નથી. કૂવાની તપાસ કરવામાં આવે તો સ્થળના ઇતિહાસ અંગે વધુ માહિતી મળી શકે છે કે નહીં તે તપાસ બાદ જ સ્પષ્ટ થશે.
હવે આ સંવેદનશીલ મામલે ગુજરાત હાઈકોર્ટની સુનાવણી અને તેના આદેશ પર તમામની નજર મંડાયેલી છે. સ્થળના ધાર્મિક દાવાઓ, ઐતિહાસિક મહત્ત્વ અને પુરાતત્ત્વ વિભાગની મિલકત અંગેનો વિવાદ કાનૂની પ્રક્રિયા દ્વારા ઉકેલાય તેવી અપેક્ષા છે.
