ચોમાસાની વિદાય બાદ સૌરાષ્ટ્ર અને ગુજરાતમાં તાપમાનનો પારો સતત ઊંચો જઈ રહ્યો છે. આસો મહિનામાં પણ ગરમીથી રાહત મળતી નથી ત્યારે આગામી બે દિવસ દરમિયાન તાપમાનમાં વધુ વધારો થવાની શક્યતા છે. જાણીતા વેધર એનાલિસ્ટ અશોકભાઈ પટેલની આગાહી મુજબ, બુધવાર અને ગુરુવારે મહત્તમ તાપમાન 38થી 41 ડિગ્રી સુધી પહોંચી શકે છે.
હાલ રાજ્યના અનેક શહેરોમાં તાપમાન સામાન્ય કરતાં ઊંચું નોંધાઈ રહ્યું છે. અમદાવાદમાં મહત્તમ તાપમાન 36.8 ડિગ્રી, રાજકોટમાં 39.8 ડિગ્રી અને પોરબંદરમાં 38.6 ડિગ્રી નોંધાયું હતું. જ્યારે વડોદરામાં 36.6 ડિગ્રી, ભુજમાં 38.2 ડિગ્રી અને ડીસામાં 38.8 ડિગ્રી તાપમાન નોંધાયું હતું.
14 અને 15 ઓક્ટોબરે ગરમીમાં વધુ વધારો
અશોકભાઈ પટેલના જણાવ્યા મુજબ, 19 ઓક્ટોબર સુધી સૌરાષ્ટ્ર-ગુજરાતમાં તાપમાન સામાન્ય કરતાં ઊંચું રહેવાની શક્યતા છે. મોટાભાગના દિવસોમાં મહત્તમ તાપમાન 37થી 40 ડિગ્રીની વચ્ચે રહી શકે છે. ખાસ કરીને 14 અને 15 ઓક્ટોબરે તાપમાનમાં વધુ 1થી 1.5 ડિગ્રીનો વધારો થતાં પારો 38થી 41 ડિગ્રી સુધી પહોંચી શકે છે.
પશ્ચિમથી ઉત્તર-પશ્ચિમના પવન ફૂંકાશે
આગાહીના સમયગાળા દરમિયાન પવન મુખ્યત્વે પશ્ચિમ અને ઉત્તર-પશ્ચિમ દિશામાંથી ફૂંકાવાની સંભાવના છે. પવનની ગતિ 10થી 15 કિલોમીટર પ્રતિ કલાક રહેવાની શક્યતા છે, જ્યારે પવનના ઝાટકા 15થી 25 કિલોમીટર પ્રતિ કલાક સુધી પહોંચી શકે છે.
ચોમાસા બાદ પણ ગરમીનું પ્રમાણ ઊંચું રહેવાની આગાહી વચ્ચે બપોરના સમયે બહાર નીકળતા લોકોએ સાવચેતી રાખવી અને પૂરતું પાણી પીવું હિતાવહ છે.
