નવરાત્રિના તહેવાર વચ્ચે અમદાવાદના રિંગ રોડ અને હાઈવે પર ગંભીર અકસ્માતોની ઘટનાઓ સામે આવી છે. સનાથલ, ઓઢવ અને અસલાલી-કમોડ સર્કલ નજીક બનેલા ત્રણ અલગ-અલગ અકસ્માતોમાં ચાર લોકોનાં મોત નીપજ્યાં છે. ક્યાંક રસ્તા પર પાર્ક કરેલા કન્ટેનર ટ્રક પાછળ બાઈક અથડાઈ હતી, તો ક્યાંક ટ્રક અને બોલેરો પીકઅપની ટક્કરે વાહનચાલકોએ જીવ ગુમાવ્યો હતો. પોલીસે ત્રણેય કેસમાં ગુના નોંધી વધુ તપાસ હાથ ધરી છે.
સનાથલમાં કન્ટેનર પાછળ બાઈક અથડાતાં બે યુવાનનાં મોત
સનાથલથી ઉજાલા તરફ જતા માર્ગ પર 13 ઓક્ટોબરની રાત્રે પોલારીસ શોરૂમ નજીક સલામતીનાં કોઈ ચિહ્નો વિના પાર્ક કરેલા કન્ટેનર ટ્રક પાછળ બાઈક અથડાઈ હતી. અકસ્માતમાં હર્ષદકુમાર ઉર્ફે રવિ મઢવી (24) અને તેના મિત્ર શનિ રાવળ (20)ને ગંભીર ઈજાઓ થતાં બંનેનાં ઘટનાસ્થળે જ મોત નીપજ્યાં હતાં. આ મામલે એસ.જી.-2 ટ્રાફિક પોલીસે ટ્રકચાલક સામે ગુનો નોંધ્યો છે.
ઓઢવ-નિકોલ રિંગ રોડ પર ટ્રકની ટક્કરે બાઈકચાલકનું મોત
11 ઓક્ટોબરની રાત્રે ઓઢવથી નિકોલ રિંગ રોડ વચ્ચે ટેલર ટ્રકની ટક્કરથી શૈલેષ માણાભાઈ રોત (22)નું મોત થયું હતું. ડુંગરપુરના વતની શૈલેષ અમદાવાદમાં કડિયાકામ કરતા હતા. તેઓ બાઈક પર પસાર થઈ રહ્યા હતા ત્યારે ટ્રકચાલકે ટક્કર મારતાં ગંભીર અકસ્માત સર્જાયો હતો. આ અંગે ‘આઈ’ ડિવિઝન ટ્રાફિક પોલીસે ફરિયાદના આધારે કાર્યવાહી હાથ ધરી છે.
અસલાલી-કમોડ સર્કલ પાસે બોલેરોની ટક્કર, પ્લાન્ટ મેનેજરનું મોત
13 ઓક્ટોબરની સવારે એસ.પી. રિંગ રોડ પર અસલાલી સર્કલથી કમોડ સર્કલ તરફ જતાં માર્ગ પર બોલેરો પીકઅપે ઇલેક્ટ્રિક ટુ-વ્હીલરને ટક્કર મારી હતી. આ અકસ્માતમાં 33 વર્ષીય ભાવેશ ભોળાભાઈ દુધાતને માથાના પાછળના ભાગે ગંભીર ઈજાઓ થતાં તેમનું મોત થયું હતું. તેઓ ખેડા ખાતે એક કંપનીમાં પ્લાન્ટ મેનેજર તરીકે ફરજ બજાવતા હતા અને મકરબા ખાતે મીટિંગ માટે જઈ રહ્યા હતા. અકસ્માત બાદ બોલેરોચાલક ફરાર થઈ ગયો હતો. મૃતકનાં પત્નીની ફરિયાદના આધારે ટ્રાફિક પોલીસે તપાસ શરૂ કરી છે.
બેદરકારીપૂર્વક ડ્રાઇવિંગ અને અસુરક્ષિત પાર્કિંગ ગંભીર ચિંતાનો વિષય
આ ઘટનાઓ ફરી એકવાર માર્ગ સલામતી અંગે સવાલો ઊભા કરે છે. રિંગ રોડ અને હાઈવે પર વાહન હંકારતી વખતે સાવચેતી રાખવી તેમજ વાહન પાર્ક કરતી વખતે જરૂરી સલામતીનાં ચિહ્નો અને લાઈટનો ઉપયોગ કરવો અત્યંત જરૂરી છે.
