ગુજરાતી ફિલ્મ ‘ડમરુ’ 23 ઑક્ટોબરે સિનેમાઘરોમાં થશે રિલીઝ; દિવાળી પહેલાં દર્શકોને મળશે મનોરંજનની ભેટ
ગુજરાતી ફિલ્મપ્રેમીઓ માટે હાસ્ય, સસ્પેન્સ, લાગણીઓ અને પારિવારિક મનોરંજનથી ભરપૂર ફિલ્મ ‘ડમરુ’ આગામી 23 ઑક્ટોબર, 2026ના રોજ ગુજરાતભરના સિનેમાઘરોમાં રિલીઝ થવા જઈ રહી છે. દિવાળીના તહેવાર પહેલાં રજૂ થનારી આ ફિલ્મમાં મનોરંજનના વિવિધ રંગો જોવા મળશે. ફિલ્મની સ્ટારકાસ્ટ નીરાલી ઓઝા અને મૌલક ચૌહાણે ‘સાંજ સમાચાર’ની મુલાકાત દરમિયાન ફિલ્મ અંગે રસપ્રદ વાતો રજૂ કરી હતી.
ગુજોત્સવ પ્રોડક્શન અને વ્રજ ફિલ્મ્સ દ્વારા પ્રસ્તુત આ ફિલ્મનું દિગ્દર્શન હાર્દિક પરીખે કર્યું છે. ફિલ્મના નિર્માતાઓમાં રમેશ પ્રજાપતિ, કૃપા સોની અને સંજય સોનીનો સમાવેશ થાય છે.
ફિલ્મમાં સંજય ગોરડિયા, નક્ષરાજ, નીરવ વૈદ્ય, નીરાલી ઓઝા, સૌરભ રાજ્યગુરુ, મૌલક ચૌહાણ, હેમાંગ દવે, સંજય ગલસર, મકરંદ શુક્લા, ભાર્ગવ પરમાર, વિશાલ વૈશ્ય, ઝંખના અને સતીશ ભટ્ટ સહિતના જાણીતા કલાકારો વિવિધ ભૂમિકામાં જોવા મળશે.
‘ડમરુ’માં માત્ર હાસ્ય જ નહીં, પરંતુ સસ્પેન્સ અને લાગણીસભર પ્રસંગોનો પણ સમાવેશ કરવામાં આવ્યો છે. પરિવાર સાથે બેસીને માણી શકાય તેવું મનોરંજન પૂરું પાડવાના પ્રયાસ સાથે ફિલ્મ તૈયાર કરવામાં આવી છે. વાર્તા, અભિનય અને હાસ્યના વિવિધ પ્રસંગો દ્વારા દર્શકોને અંત સુધી જકડી રાખવાનો ફિલ્મનો ઉદ્દેશ છે.
હવે 23 ઑક્ટોબરે ફિલ્મ રિલીઝ થયા બાદ ગુજરાતી દર્શકો તેને કેવો પ્રતિસાદ આપે છે તેના પર સૌની નજર રહેશે.
