દાણીલીમડાની ‘રેટ્રો ગેલેરી’માં પોલીસનો દરોડો; જીન્સ, શર્ટ અને ટી-શર્ટ સહિત 102 નંગ કપડાં જપ્ત, વેપારી સામે ગુનો નોંધાયો
અમદાવાદ: દિવાળીના તહેવાર દરમિયાન કપડાંની ખરીદી કરતા ગ્રાહકો માટે ચેતવણીરૂપ કિસ્સો સામે આવ્યો છે. શહેરના દાણીલીમડા વિસ્તારમાં શાહઆલમ ટોલનાકા પાસે આવેલી ‘Retro Galary’ નામની દુકાનમાંથી જાણીતી આંતરરાષ્ટ્રીય બ્રાન્ડ CHROME HEARTS LLCના નામ અને લોગો ધરાવતાં કથિત નકલી કપડાંનો જથ્થો ઝડપાયો છે. પોલીસે દરોડા દરમિયાન ₹2,71,600ની કિંમતનાં 102 કપડાં જપ્ત કરીને વધુ તપાસ હાથ ધરી છે.
ટ્રેડમાર્ક કંપનીના અધિકારીની ફરિયાદ બાદ કાર્યવાહી
મળતી માહિતી મુજબ, દિલ્હીની ‘યુનાઇટેડ એન્ડ યુનાઇટેડ પેટન્ટ એન્ડ ટ્રેડમાર્ક’ કંપનીમાં ફિલ્ડ ઓફિસર તરીકે ફરજ બજાવતા મુકેશકુમાર દિનાનાથને દાણીલીમડા વિસ્તારમાં બ્રાન્ડના નામ અને લોગોનો કથિત દુરુપયોગ કરીને કપડાં વેચવામાં આવતા હોવાની જાણ થઈ હતી. ત્યારબાદ પોલીસને જાણ કરવામાં આવતાં 14 ઑક્ટોબરની સાંજે શાહઆલમ ટોલનાકા નજીક આવેલી દુકાનમાં દરોડો પાડવામાં આવ્યો હતો.
102 નંગ કપડાંનો જથ્થો જપ્ત
પોલીસની તપાસ દરમિયાન દુકાનમાંથી કંપનીના કથિત નકલી લોગો ધરાવતાં કપડાં મળી આવ્યાં હતાં. જપ્ત કરાયેલા જથ્થામાં નીચેની વસ્તુઓનો સમાવેશ થાય છે:
50 નંગ જીન્સ: કિંમત ₹1,50,000
40 નંગ શર્ટ: કિંમત ₹1,00,000
12 નંગ ટી-શર્ટ: કિંમત ₹21,600
આમ, કુલ 102 નંગ કપડાંની કિંમત ₹2,71,600 થાય છે.
વટવાના વેપારી સામે ગુનો નોંધાયો
આ કેસમાં પોલીસે મેવ સલમાનખાન મોહસીનભાઈ (ઉંમર 30 વર્ષ), રહે. હર્ષવર્ધન સોસાયટી, મખ્દુમનગર, સૈયદવાડી, વટવા સામે કોપીરાઇટ એક્ટ હેઠળ ગુનો નોંધી તપાસ શરૂ કરી છે.
તહેવારોમાં બ્રાન્ડેડ કપડાં ખરીદતી વખતે ગ્રાહકોએ વિશ્વસનીય દુકાનમાંથી ખરીદી કરવી, બિલ લેવું અને કપડાં પરના બ્રાન્ડના લેબલ તથા અન્ય વિગતો ચકાસવી જરૂરી છે.
