ગીતામંદિર મોબાઇલ માર્કેટમાં LCB ઝોન-6ના દરોડા; 1,034 મોબાઇલ સહિત ₹7.07 લાખનો મુદ્દામાલ જપ્ત, રિલીફ રોડના હોલસેલ સપ્લાયર્સની પણ તપાસ
અમદાવાદ: શહેરના ગીતામંદિર એસ.ટી. બસ સ્ટેશન માર્કેટમાં બ્રાન્ડેડ કંપનીના નામ અને લોગોનો કથિત દુરુપયોગ કરીને નકલી મોબાઇલ ફોન વેચવાના કૌભાંડનો પર્દાફાશ થયો છે. LCB ઝોન-6ની ટીમે તપાસ દરમિયાન 1,034 મોબાઇલ ફોન, લેપટોપ અને અન્ય એસેસરીઝ સહિત કુલ ₹7,07,270નો મુદ્દામાલ જપ્ત કર્યો છે. આ મામલે કાગડાપીઠ પોલીસે ગીતામંદિર માર્કેટના રિટેલ વેપારીઓ અને કાલુપુર રિલીફ રોડના હોલસેલ સપ્લાયર્સ સહિત 14 વેપારીઓ સામે ગુનો નોંધી તપાસ શરૂ કરી છે.
અધિકૃત પ્રતિનિધિની તપાસમાં ખુલાસો
ગીતામંદિર એસ.ટી. બસ સ્ટેશનની મોબાઇલ માર્કેટમાં ગ્રાહકોને અસલીના નામે ડુપ્લિકેટ મોબાઇલ વેચવામાં આવતા હોવાની માહિતી મળતાં LCB ઝોન-6ની ટીમે તપાસ હાથ ધરી હતી. આ દરમિયાન બ્રાન્ડેડ કંપનીના અધિકૃત પ્રતિનિધિ તરીકે સૌરભકુમાર રાજેશ્વરી પાંડેયની મદદથી મોબાઇલ ફોનની તપાસ કરાવવામાં આવી હતી.
તપાસમાં જપ્ત કરાયેલા સેમસંગ મોબાઇલ ફોન બનાવટી હોવાનું અને કંપનીની મંજૂરી વિના તેના ટ્રેડમાર્ક તથા લોગોનો ઉપયોગ કરવામાં આવ્યો હોવાનું સામે આવ્યું હતું. ત્યારબાદ પોલીસે દુકાનો અને ગોડાઉનમાં તપાસ કરીને બિલ વગરનો માલ કબજે કર્યો હતો.
₹7.07 લાખનો મુદ્દામાલ જપ્ત
પોલીસે ગીતામંદિર માર્કેટની ભોલેનાથ મોબાઇલ, મહાવીર મોબાઇલ સહિતની દુકાનોમાંથી નીચે મુજબનો મુદ્દામાલ કબજે કર્યો હતો:
1,034 મોબાઇલ ફોન: ₹6,61,870
HP લેપટોપ: ₹12,000
ચાર્જર: ₹3,000
બેટરીઓ: ₹28,850
મોબાઇલ બોડી: ₹1,100
આમ, કુલ ₹7,07,270નો મુદ્દામાલ જપ્ત કરવામાં આવ્યો છે.
રિલીફ રોડના હોલસેલ વેપારીઓ પાસેથી માલ લાવ્યાની વિગતો
પોલીસ તપાસમાં સામે આવ્યું હતું કે ગીતામંદિર માર્કેટના કેટલાક વેપારીઓ કાલુપુર રિલીફ રોડ પર આવેલા રાજ કોમ્પ્લેક્સ અને મેટ્રો પ્લાઝાના હોલસેલ વેપારીઓ પાસેથી બિલ વગર મોબાઇલ અને એસેસરીઝ ખરીદતા હતા. આ સપ્લાય ચેઇન અંગે પણ તપાસ હાથ ધરવામાં આવી છે.
કાગડાપીઠ પોલીસે ટ્રેડમાર્ક્સ એક્ટ તથા ભારતીય ન્યાય સંહિતાની છેતરપિંડી અને કાવતરા સંબંધિત કલમો હેઠળ ગુનો નોંધ્યો છે.
14 વેપારીઓ સામે કાર્યવાહી
ગીતામંદિર માર્કેટના વેપારીઓ: રમેશ સોલંકી, જીતેન્દ્ર ઉર્ફે જીતુ ભુરારામ પ્રજાપતિ, રવીન્દ્રકુમાર ઉર્ફે રવિ લક્ષ્મણરાવ છીપા, રૂપારામ થાનાજી ચૌધરી, દીનેશકુમાર મઘારામ ઘાંચી અને મહેન્દ્ર મોદી.
કાલુપુર રિલીફ રોડના સપ્લાયર્સ: અશોક, ભઈલુ, વિવેક (કેસરીનંદન), ગોપી, કુલદીપ, રાજુ (આર.એસ.બી. ટ્રેડર્સ), પ્રવિણ અને દર્શન (શિવાય કોમ્યુનિકેશન).
પોલીસે આ તમામ સામે ગુનો નોંધી નકલી મોબાઇલના સપ્લાય અને વેચાણના નેટવર્ક અંગે વધુ તપાસ શરૂ કરી છે.
