વડોદરા શહેરના તાંદલજા વિસ્તારમાં ડેન્ગ્યુના દર્દીઓ વધી રહ્યા હોવાની ફરિયાદો સામે આવતાં સ્થાનિક રહીશોમાં ચિંતા અને રોષ જોવા મળી રહ્યો છે. શાલીમાર ડુપ્લેક્સ સહિત આસપાસના વિસ્તારોમાં ડેન્ગ્યુના કેસોમાં વધારો થતો હોવાના અહેવાલ વચ્ચે સફાઈના અભાવ અને મચ્છરોના વધતા ઉપદ્રવને કારણે રોગચાળો વધુ વકરવાની ભીતિ ઊભી થઈ છે.
સામાજિક કાર્યકર ફારુક સોનીના જણાવ્યા મુજબ, ડેન્ગ્યુના દર્દીઓની સંખ્યામાં વધારો થતાં ખાનગી હોસ્પિટલોમાં પણ દર્દીઓની ભીડ જોવા મળી રહી છે. સ્થાનિકો દ્વારા મચ્છરોના ઉપદ્રવને નિયંત્રિત કરવા અને વિસ્તારમાં સ્વચ્છતા જાળવવા પૂરતી કામગીરી થતી ન હોવાના આક્ષેપ કરવામાં આવ્યા છે. આ પરિસ્થિતિને કારણે રહીશોમાં આરોગ્યને લઈને ચિંતા વધી છે.
ડેન્ગ્યુના સંભવિત ફેલાવાને અટકાવવા તાંદલજા વિસ્તારમાં તાત્કાલિક સફાઈ અભિયાન હાથ ધરવા, મચ્છરનાશક દવાનો છંટકાવ કરવા અને મચ્છરોના ઉત્પત્તિસ્થળો શોધીને દૂર કરવાની માગ ઊઠી છે. હવે સ્થાનિકોની ફરિયાદોને પગલે મહાનગરપાલિકાનું તંત્ર ક્યારે કાર્યવાહી કરે છે અને રોગચાળાને નિયંત્રણમાં લેવા કેવાં પગલાં ભરે છે તેના પર સૌની નજર છે.
