અમદાવાદ શહેરના નરોડા વિસ્તારમાં આવેલી હંસપુરા પોલીસ ચોકી અને નરોડા પોલીસ સ્ટેશન ખાતે પોલીસની કામગીરીમાં અડચણ ઊભી કરવા તથા હોબાળો મચાવવાનો મામલો સામે આવ્યો છે. મિલકતના વિવાદમાં એક વ્યક્તિનું નિવેદન નોંધવાની કાર્યવાહી દરમિયાન બે વકીલો અને આરોપી પિતા-પુત્ર વચ્ચે પોલીસ સાથે બોલાચાલી થઈ હોવાનો આક્ષેપ છે. આ મામલે હંસપુરા પોલીસ ચોકીના PSI કે. એસ. કુંપાવતે નરોડા પોલીસ સ્ટેશનમાં ચારેય સામે ફરિયાદ નોંધાવતા પોલીસે વધુ તપાસ હાથ ધરી છે.
મિલકતના વિવાદમાં નિવેદન નોંધતી વખતે શરૂ થયો વિવાદ
મળતી માહિતી અનુસાર, ગત 14 ઓક્ટોબરના રોજ હંસપુરા પોલીસ ચોકીના PSI કે. એસ. કુંપાવત સમક્ષ સુરજકુંવર ચારણે પાડોશમાં રહેતા નરેન્દ્રસિંહ ચારણ સામે મિલકતને લગતી અરજી આપી હતી. આ અરજીના અનુસંધાને જરૂરી પુરાવા સાથે હાજર રહેવા જણાવવામાં આવતા નરેન્દ્રસિંહ સાંજના સમયે પોલીસ ચોકી ખાતે પહોંચ્યા હતા. પોલીસ દ્વારા તેમનું નિવેદન નોંધવાની પ્રક્રિયા ચાલી રહી હતી, ત્યારે ધ્રુવ પટેલ અને ભરત નામના બે વકીલો ત્યાં આવી પહોંચ્યા હતા.
આ દરમિયાન પોલીસની કાર્યવાહી અંગે વકીલો અને PSI વચ્ચે બોલાચાલી થઈ હતી. ફરિયાદ મુજબ, બોલાચાલી દરમિયાન એક વકીલે ઉશ્કેરાઈને પોલીસને ઉદ્દેશીને અયોગ્ય શબ્દો કહ્યા હતા. ત્યારબાદ PSI દ્વારા કાયદેસરની કાર્યવાહી અંગે સ્પષ્ટતા કરવામાં આવતાં વકીલોએ મોબાઇલ ફોનથી વીડિયો ઉતારવાનું શરૂ કર્યું હોવાનો પણ આક્ષેપ છે. આ ઘટનાક્રમ બાદ પોલીસે નરેન્દ્રસિંહ ચારણ વિરુદ્ધ કાર્યવાહી કરી તેમને નરોડા પોલીસ સ્ટેશનના લોકઅપમાં રાખ્યા હતા.
નરોડા પોલીસ સ્ટેશનમાં પણ મામલો વકર્યો
હંસપુરા પોલીસ ચોકી ખાતે થયેલી બોલાચાલી બાદ બંને વકીલો નરોડા પોલીસ સ્ટેશન પહોંચ્યા હતા. ત્યાં તેમણે પોતાના અસીલ નરેન્દ્રસિંહને મેડિકલ સારવારની જરૂર હોવાનું જણાવી 108 એમ્બ્યુલન્સ બોલાવી હતી. એમ્બ્યુલન્સના સ્ટાફે તપાસ કર્યા બાદ કોઈ ગંભીર સ્વાસ્થ્ય સમસ્યા જણાતી ન હોવાનું જણાવ્યું હતું. તેમ છતાં નરેન્દ્રસિંહને સિવિલ હોસ્પિટલ લઈ જવાનું નક્કી કરવામાં આવ્યું હતું.
ત્યારબાદ નરેન્દ્રસિંહને પોલીસની મોબાઇલ વાનમાં બેસાડીને મેડિકલ તપાસ માટે લઈ જવાની તૈયારી કરવામાં આવી રહી હતી. આ સમયે બંને વકીલોએ ફરીથી મોબાઇલથી વીડિયો ઉતારવાનું શરૂ કરી પોલીસની કામગીરી સામે વિરોધ કર્યો હોવાનો ફરિયાદમાં ઉલ્લેખ છે. આ દરમિયાન નરેન્દ્રસિંહે પોલીસ સ્ટેશનના કમ્પાઉન્ડમાં અપશબ્દો બોલી પોલીસકર્મીઓને ધમકી આપી હોવાનો પણ આક્ષેપ કરવામાં આવ્યો છે.
પોલીસની વાન પર ચડી ફરજમાં અડચણનો આક્ષેપ
ફરિયાદ મુજબ, નરેન્દ્રસિંહને મેડિકલ તપાસ માટે લઈ જવાની પ્રક્રિયા દરમિયાન તેમના પુત્ર અને બંને વકીલો પોલીસની મોબાઇલ વાન પર બળજબરીપૂર્વક ચડી ગયા હતા. આ ઘટનાને પગલે પોલીસની કામગીરીમાં વિક્ષેપ ઊભો થયો હોવાનો આક્ષેપ છે. હંસપુરા પોલીસ ચોકીથી શરૂ થયેલો વિવાદ નરોડા પોલીસ સ્ટેશન સુધી પહોંચતાં મામલો વધુ ગંભીર બન્યો હતો.
સમગ્ર ઘટનાને પગલે PSI કે. એસ. કુંપાવતે નરોડા પોલીસ સ્ટેશનમાં બે વકીલ અને આરોપી પિતા-પુત્ર સહિત ચાર વ્યક્તિઓ સામે પોલીસની ફરજમાં અડચણ ઊભી કરવા, ગેરવર્તન કરવા અને હોબાળો મચાવવા સંબંધિત ફરિયાદ નોંધાવી છે. હાલ આ મામલે પોલીસે ફરિયાદના આધારે આગળની કાયદેસરની તપાસ હાથ ધરી છે. જોકે, ફરિયાદમાં કરવામાં આવેલા આક્ષેપોની સત્યતા તપાસ બાદ જ સ્પષ્ટ થશે.
