ગોકુલધામ મેઈન રોડ પર માલવિયાનગર પોલીસની કાર્યવાહી; રીક્ષા સહિત ₹3.04 લાખનો મુદ્દામાલ કબજે, દારૂ સપ્લાય કરનાર સાહિલ ઉર્ફે સાદુની શોધખોળ શરૂ
રાજકોટમાં દારૂની હેરાફેરી માટે કચરાનો સહારો લેવામાં આવતો હોવાનો કિસ્સો સામે આવ્યો છે. ગોકુલધામ મેઈન રોડ પર સુલભ શૌચાલય નજીક કચરાના કોથળા ભરેલી શંકાસ્પદ રીક્ષાને અટકાવી પોલીસે તપાસ કરતાં અંદરથી ₹1.54 લાખની કિંમતનો દારૂનો જથ્થો મળી આવ્યો હતો. પોલીસે દારૂ અને રીક્ષા સહિત કુલ ₹3.04 લાખનો મુદ્દામાલ કબજે કરીને રીક્ષાચાલક સામે કાયદેસરની કાર્યવાહી હાથ ધરી છે. આ કેસમાં દારૂ સપ્લાય કરનાર સાહિલ ઉર્ફે સાદુ પરમારની શોધખોળ પણ શરૂ કરવામાં આવી છે.
કચરાના કોથળા વચ્ચે સંતાડ્યો હતો દારૂ
માલવિયાનગર પોલીસ મથકના પીઆઈ જે.એમ. કૈલાની રાહબરી હેઠળ પીએસઆઈ કે.ડી. મારૂ અને તેમની ટીમ પેટ્રોલિંગમાં હતી. આ દરમિયાન હેડ કોન્સ્ટેબલ અનિલભાઈ જીલરિયા અને કોન્સ્ટેબલ કરમણભાઈ જાદવને મળેલી બાતમીના આધારે પોલીસ ગોકુલધામ મેઈન રોડ પર વિજય હોટલવાળી શેરીમાં સુલભ શૌચાલય પાસે પહોંચી હતી. ત્યાં કચરાના કોથળા ભરેલી શંકાસ્પદ રીક્ષાને અટકાવી તપાસ હાથ ધરવામાં આવી હતી.
તપાસમાં ₹1.54 લાખનો દારૂ મળી આવ્યો
પોલીસે રીક્ષાચાલકની પૂછપરછ કરતાં તેનું નામ ધર્મેશ અશોકભાઈ સીતાપરા (ઉંમર 26 વર્ષ), રહે. ભોમેશ્વર વાડી, જામનગર રોડ, રાજકોટ હોવાનું જાણવા મળ્યું હતું. રીક્ષામાં ઉપરના ભાગે કચરાના કોથળા ભરેલા હોવાથી શરૂઆતમાં દારૂ દેખાયો નહોતો. જોકે, પોલીસને શંકા જતાં સઘન તપાસ કરવામાં આવી હતી. આ દરમિયાન કચરાના કોથળા વચ્ચે સંતાડેલો ₹1.54 લાખની કિંમતનો દારૂનો જથ્થો મળી આવ્યો હતો.
સાહિલ ઉર્ફે સાદુએ દારૂ મૂક્યાની કબૂલાતનો દાવો
પોલીસની પૂછપરછ દરમિયાન રીક્ષાચાલકે જણાવ્યું હોવાનું કહેવાય છે કે જામનગર રોડ પરથી સાહિલ ઉર્ફે સાદુ પરમારે કચરાના કોથળામાં સંતાડીને દારૂ રીક્ષામાં મૂક્યો હતો. ફોન પર સરનામું આપવામાં આવે ત્યારે ત્યાં દારૂ પહોંચાડવાનો હતો, તેવી કબૂલાત રીક્ષાચાલકે આપી હોવાનું પોલીસ સૂત્રોએ જણાવ્યું છે.
સપ્લાયરને ઝડપી પાડવા તપાસ તેજ
પોલીસે દારૂ અને રીક્ષા સહિત કુલ ₹3.04 લાખનો મુદ્દામાલ કબજે કર્યો છે. આ મામલે રીક્ષાચાલક વિરુદ્ધ ગુનો નોંધી કાયદેસરની કાર્યવાહી હાથ ધરવામાં આવી છે. દારૂનો જથ્થો સપ્લાય કરવાના આરોપસર સાહિલ ઉર્ફે સાદુ પરમારને ઝડપી પાડવા પોલીસે તપાસ તેજ કરી છે. દારૂ ક્યાંથી લાવવામાં આવ્યો હતો અને કોને પહોંચાડવાનો હતો તે સહિતની વિગતો મેળવવા આગળની તપાસ હાથ ધરવામાં આવી રહી છે.
