અમદાવાદથી દ્વારકા દર્શનાર્થે જઈ રહેલા યાત્રાળુઓને અકસ્માત નડ્યો; જાખર ગામના પાટિયા નજીક વહેલી સવારે ઘટના બની
દેવભૂમિ દ્વારકા જિલ્લામાં ખંભાળિયા-જામનગર હાઈવે પર આજે, 19 ઓક્ટોબરના રોજ વહેલી સવારે અકસ્માતની ઘટના સામે આવી છે. અમદાવાદથી દ્વારકા જગત મંદિરનાં દર્શન કરવા જઈ રહેલા યાત્રાળુઓ ભરેલું ટેમ્પો ટ્રાવેલર જાખર ગામના પાટિયા નજીક અચાનક ચાલકના કાબૂ બહાર જતાં રોડની નીચે ઉતરી પલટી ખાઈ ગયું હતું. આ અકસ્માતમાં આશરે 12 મુસાફરોને ઈજાઓ પહોંચતાં સ્થળ પર અફરાતફરીનો માહોલ સર્જાયો હતો.
વહેલી સવારે 6 વાગ્યે અકસ્માત
મળતી માહિતી મુજબ, ખંભાળિયા-જામનગર હાઈવે પરથી વહેલી સવારે આશરે 6 વાગ્યે ટેમ્પો ટ્રાવેલર પસાર થઈ રહ્યું હતું. આ દરમિયાન કોઈ અગમ્ય કારણોસર ચાલકે વાહન પરથી કાબૂ ગુમાવ્યો હતો. પરિણામે વાહન રોડ પરથી નીચે ઉતરી ગયું હતું અને પલટી મારી ગયું હતું. વાહનમાં મુસાફરો સવાર હોવાથી અકસ્માતને પગલે અનેક લોકોને ઈજાઓ પહોંચી હતી.
108ની ટીમે ઈજાગ્રસ્તોને હોસ્પિટલ ખસેડ્યા
અકસમાતની જાણ થતાં જ 108 ઇમરજન્સી એમ્બ્યુલન્સની ટીમ તાત્કાલિક ઘટનાસ્થળે પહોંચી હતી. ઈજાગ્રસ્ત મુસાફરોને પ્રાથમિક સારવાર આપવામાં આવી હતી અને ત્યારબાદ વધુ સારવાર માટે ખંભાળિયાની સરકારી હોસ્પિટલ ખાતે ખસેડવામાં આવ્યા હતા. અકસ્માતમાં આશરે 12 મુસાફરો ઈજાગ્રસ્ત થયા હોવાનું જાણવા મળ્યું છે.
દ્વારકા દર્શન માટે જઈ રહ્યા હતા યાત્રાળુઓ
પ્રાથમિક માહિતી અનુસાર, ટેમ્પો ટ્રાવેલરમાં સવાર તમામ યાત્રાળુઓ અમદાવાદથી દ્વારકા જગત મંદિરનાં દર્શન કરવા માટે જઈ રહ્યા હતા. યાત્રા દરમિયાન જાખર ગામના પાટિયા નજીક તેમને અકસ્માત નડ્યો હતો. વહેલી સવારે બનેલી આ ઘટનાને પગલે હાઈવે પરથી પસાર થતા વાહનચાલકોમાં પણ ચકચાર મચી હતી. જોકે, અકસ્માતનું ચોક્કસ કારણ શું હતું અને ઈજાગ્રસ્તોની હાલત કેવી છે તે અંગે વધુ વિગતોની રાહ જોવાઈ રહી છે.
