39 પેઢીઓમાં ચેકિંગ, વાસી અને અખાદ્ય ખાદ્યસામગ્રીનો નાશ; ત્રણ પેઢીને નોટિસ અને ₹2,000નો દંડ. આંગણવાડીના રસોડામાંથી પણ 8 ખાદ્યપદાર્થોના નમૂના લઈ લેબોરેટરીમાં મોકલાયા.
રાજકોટમાં નવરાત્રિ અને દશેરાના તહેવારોને ધ્યાનમાં રાખીને મહાનગરપાલિકાની આરોગ્ય અને ફૂડ શાખા દ્વારા ખાદ્યપદાર્થોમાં ભેળસેળ અને સ્વચ્છતાના ધોરણોની ચકાસણી માટે સઘન અભિયાન હાથ ધરવામાં આવ્યું છે. મીઠાઈ-ફરસાણની દુકાનો, સુપરમાર્કેટ અને અન્ય ખાદ્યપદાર્થોના વેચાણ કેન્દ્રો સહિત કુલ 39 પેઢીઓમાં તપાસ કરવામાં આવી હતી. આ દરમિયાન મીઠાઈ, ફરસાણ અને કાચા માલ સહિતના કુલ 44 નમૂના લઈ પરીક્ષણ માટે લેબોરેટરીમાં મોકલવામાં આવ્યા હતા.
ચેકિંગ દરમિયાન વાસી ખાદ્યસામગ્રીનો નાશ કરવામાં આવ્યો હતો, જ્યારે ત્રણ પેઢીને નોટિસ આપી કુલ ₹2,000નો દંડ વસૂલવામાં આવ્યો હતો. કાલાવડ રોડ પર આવેલા ક્રિસ્ટલ મોલના ડી-માર્ટમાંથી લીચી જ્યૂસ ડ્રિન્કનો નમૂનો પણ લેવામાં આવ્યો હતો.
મીઠાઈ-ફરસાણની દુકાનોમાં તપાસ
રૈયા રોડના તિરુપતિનગર-2માં શ્યામ ફરસાણને નોટિસ આપી ₹500નો દંડ ફટકારાયો હતો. ભગવતીપરા મેઈન રોડ પર આવેલી ભગવતી ફરસાણ એન્ડ સ્વીટ માર્ટમાંથી મરચું અને જલેબીના નમૂના લેવામાં આવ્યા હતા. અહીં છાપેલી પસ્તીનો ઉપયોગ કરવા બદલ ₹500નો ચાર્જ વસૂલાયો હતો.
દશેરા પૂર્વેની ડ્રાઇવમાં શક્તિરાજ સ્વીટ એન્ડ નમકીન, કૈલાસ ફરસાણ, પંચનાથ નમકીન, બજરંગ ફરસાણ, જલિયાણ ફરસાણ, રામદેવ ડેરી અને બાલાજી ફરસાણ સહિતની દુકાનોમાંથી વિવિધ ખાદ્યપદાર્થોના નમૂના લેવાયા હતા. તેમાં ફાફડા, જલેબી, ગાંઠિયા, મીઠા સાટા, કેસર સેન્ડવીચ મીઠાઈ, રોઝ મિલ્ક અને બ્લુબેરી મીઠાઈનો સમાવેશ થાય છે.
આ ઉપરાંત ધારેશ્વર ડેરી, માટેલ સ્વીટ, અરિહંત સ્વીટ માર્ટ, યોગેશ્વર ડેરી, વૃંદાવન ડેરી, ખોડિયાર વિજય ડેરી, ભગવતી સ્વીટ એન્ડ નમકીન, શ્રી કૃષ્ણ ડેરી, પ્રણામી ફરસાણ અને મુરલીધર ફરસાણમાંથી પણ નમૂના લેવામાં આવ્યા હતા. ક્રિસ્ટલ મોલ નજીક આવેલી રીબેલ ફૂડ્સને નોટિસ આપવામાં આવી હતી.
મવડી મેઈન રોડ, જીવરાજપાર્ક, પુનિતનગર, વૈશાલીનગર અને ચંદનપાર્ક મેઈન રોડ સહિતના વિસ્તારોમાં પણ તપાસ કરવામાં આવી હતી. વિવિધ ગરબા અને રાસોત્સવની કેન્ટીનમાં ચેકિંગ કરીને આયોજકો તથા ખેલૈયાઓને સ્વચ્છતા અને હાઇજિનનાં ધોરણો અંગે માર્ગદર્શન આપવામાં આવ્યું હતું.
આંગણવાડીના રસોડામાંથી પણ 8 નમૂના લેવાયા
મનપાની ફૂડ શાખાએ ભગવતીપરા મેઈન રોડ પર શાળા નંબર 16 સામે આવેલા કોર્પોરેશનના આંગણવાડી રસોડામાં પણ તપાસ કરી હતી. પારસ એગ્રો એજન્સી દ્વારા સંચાલિત આ રસોડામાંથી બાળકોને આપવામાં આવતા ખોરાકના આઠ નમૂના લેવામાં આવ્યા હતા.
તેમાં સત્વ સિંગતેલ, તૈયાર શીરો, વઘારેલા ચણા, મિક્સ વેજિટેબલ, થેપલા, ગોળ, કલ્યાણ બ્રાન્ડની રાઈ અને જીરુંનો સમાવેશ થાય છે. આ તમામ નમૂના પરીક્ષણ માટે લેબોરેટરીમાં મોકલવામાં આવ્યા છે.
ફૂડ ટ્રક અને ડેરીમાંથી 36 કિલો ખાદ્યસામગ્રીનો નાશ
ફૂડ વિભાગની અલગ તપાસ દરમિયાન મવડીના પુનિતનગરમાં ઉદગમ સ્કૂલ પાસે આવેલી મોમોનીસ ફૂડ ટ્રકમાંથી 20 કિલો વાસી અને પડતર ફ્રોઝન મોમોઝ તથા મંચુરિયન પેસ્ટ અને ત્રણ કિલો દાઝેલા તેલ સહિત કુલ 23 કિલો ખાદ્યસામગ્રીનો નાશ કરવામાં આવ્યો હતો.
મોરબી રોડ પર રાધિકા પાર્ક નજીક શ્રીહરિનગર-બીમાં આવેલી શ્રી સીતારામ ડેરીમાંથી બટર બાસ્કેટ અને ગુલાબ-પિસ્તા સેન્ડવિચ બરફીના નમૂના લેવામાં આવ્યા હતા. અહીંથી નવ કિલો વાસી અને પડતર મીઠાઈ તથા ચાર કિલો એક્સપાયરી ડેટ વટાવી ચૂકેલી ચેરી-કરોન્ડાનો નાશ કરાયો હતો. આમ, ડેરીમાંથી કુલ 13 કિલો ખાદ્યસામગ્રીનો નાશ કરી ₹1,000નો દંડ વસૂલવામાં આવ્યો હતો. બંને પેઢીઓને નોટિસ પણ આપવામાં આવી હતી.
તહેવારો દરમિયાન ખાદ્યપદાર્થોની માંગ વધતી હોવાથી ફૂડ વિભાગની આ કાર્યવાહી મહત્વપૂર્ણ બની છે. હવે લેબોરેટરીના અહેવાલ બાદ નમૂનાઓની ગુણવત્તા અંગે વધુ સ્પષ્ટતા થશે.
