દૂધરેજના મામાના મંદિર પાસે અકસ્માત; રેલવે ટ્રેકને નુકસાન, ડબ્બા હટાવી સમારકામની કામગીરી શરૂ
સુરેન્દ્રનગરઃ સુરેન્દ્રનગર નજીક દૂધરેજના મામાના મંદિર પાસે માલગાડી પાટા પરથી ખડી પડતાં રેલવે તંત્રમાં દોડધામ મચી ગઈ હતી. આ દુર્ઘટનામાં કોઈ જાનહાનિના અહેવાલ નથી, પરંતુ રેલવે ટ્રેકને નુકસાન પહોંચતાં રાજકોટ-સુરેન્દ્રનગર રૂટ પર ટ્રેન વ્યવહાર ખોરવાયો હોવાના અહેવાલ છે.
માલગાડીના ડબ્બા પાટા પરથી ઉતરી જતાં આ રૂટ પરથી પસાર થતી પેસેન્જર અને એક્સપ્રેસ ટ્રેનોની અવરજવર પર અસર થવાની શક્યતા છે. ખાસ કરીને અમદાવાદ અને રાજકોટ વચ્ચે મુસાફરી કરતા પ્રવાસીઓને વિલંબ અને હાલાકીનો સામનો કરવો પડી શકે છે.
ઘટનાની જાણ થતાં રેલવેના અધિકારીઓ અને ટેકનિકલ ટીમ ઘટનાસ્થળે પહોંચી હતી. પાટા પરથી ઉતરેલા ડબ્બાઓને દૂર કરવા તેમજ ક્ષતિગ્રસ્ત ટ્રેકનું સમારકામ કરવાની કામગીરી શરૂ કરવામાં આવી છે.
રેલવે તંત્ર દ્વારા ટ્રેન વ્યવહાર વહેલી તકે પૂર્વવત કરવા પ્રયાસો હાથ ધરાયા છે. જોકે, કઈ ટ્રેનો રદ થઈ છે અથવા તેમના સમયમાં ફેરફાર થયો છે તે અંગેની સત્તાવાર વિગતોની રાહ જોવાઈ રહી છે. મુસાફરોએ મુસાફરી પહેલાં રેલવેની સત્તાવાર માહિતી તપાસવી હિતાવહ છે.
