હવાઈ ભાડાં અને ડોલરના ભાવ વધતાં ટૂર પેકેજ 20થી 30 ટકા મોંઘાં : દુબઈના બુકિંગમાં 50 ટકાનો ઘટાડો, ટ્રેન પ્રવાસ તરફ લોકોનો ઝુકાવ
દિવાળીના તહેવારો નજીક આવતાં જ બજારોમાં ખરીદીની સાથે પ્રવાસનનો માહોલ પણ જામવા લાગ્યો છે. લાંબી રજાઓનો લાભ લઈને અનેક પરિવારો દેશ-વિદેશમાં ફરવા જવાનું આયોજન કરી રહ્યા છે. ટ્રાવેલ એજન્સીઓમાં ઇન્ટરનેશનલ અને ડોમેસ્ટિક ટૂર પેકેજ માટે પૂછપરછ તથા બુકિંગમાં વધારો જોવા મળી રહ્યો છે. જોકે, હવાઈ ટિકિટનાં વધતાં ભાડાં અને ડોલરના ભાવમાં વધારાને કારણે આ વર્ષે પ્રવાસ કરવો મોંઘો બન્યો છે.
ઇન્ટરનેશનલ ટૂરમાં વિયેતનામનું આકર્ષણ
આ વર્ષે વિદેશ પ્રવાસ માટે વિયેતનામ પ્રવાસીઓની પસંદગીમાં મોખરે હોવાનું ટ્રાવેલ એજન્સીઓ જણાવી રહી છે. આ ઉપરાંત બાલી, સિંગાપોર, મલેશિયા, બાકુ, હોંગકોંગ અને દુબઈ જેવા સ્થળો માટે પણ બુકિંગ થઈ રહ્યાં છે. ખાસ કરીને દક્ષિણપૂર્વ એશિયાના દેશો તરફ પ્રવાસીઓનો ઝુકાવ જોવા મળી રહ્યો છે.
ટ્રાવેલ એજન્સીના સંચાલક દીપકભાઈ કારિયાના જણાવ્યા મુજબ, અગાઉના ઉનાળુ વેકેશન દરમિયાન ગલ્ફ દેશોના કેટલાક પ્રવાસો રદ થતાં ટ્રાવેલ ઇન્ડસ્ટ્રીને અસર થઈ હતી. હાલ દિવાળીના વેકેશન માટે દુબઈ સહિતનાં સ્થળોનું બુકિંગ ચાલુ છે, પરંતુ ગત વર્ષની સરખામણીએ દુબઈના બુકિંગમાં અંદાજે 50 ટકાનો ઘટાડો નોંધાયો હોવાનું તેમણે જણાવ્યું હતું.
ટૂર પેકેજ 20થી 30 ટકા મોંઘાં
હવાઈ ટિકિટનાં ભાડાં અને ડોલરના ભાવમાં વધારાની સીધી અસર પ્રવાસન બજેટ પર પડી રહી છે. ટ્રાવેલ એજન્સીઓના જણાવ્યા મુજબ, ગત વર્ષની સરખામણીએ ટૂર પેકેજના ભાવમાં અંદાજે 20થી 30 ટકાનો વધારો થયો છે. કેટલાક પેકેજમાં રૂ.10 હજારથી રૂ.15 હજાર સુધીનો વધારો થતાં પ્રવાસીઓ ખર્ચનું બજેટ ધ્યાનમાં રાખીને નિર્ણય લઈ રહ્યા છે.
ભાવવધારાને કારણે કેટલાક લોકો વિદેશ પ્રવાસને બદલે ઓછા ખર્ચે પૂર્ણ થઈ શકે તેવા ડોમેસ્ટિક ટૂર પેકેજ પસંદ કરી રહ્યા છે. ખાસ કરીને રૂ.2 લાખની અંદર પરિવાર સાથે પ્રવાસ પૂર્ણ થઈ શકે તેવા વિકલ્પોની માંગ જોવા મળી રહી છે.
ડોમેસ્ટિક ટૂરમાં કાશ્મીર, કેરળ અને ઉત્તરાખંડની માંગ
દેશમાં ફરવા માટે કેરળ, જમ્મુ-કાશ્મીર, ઉત્તરાખંડ, ગોવા અને મેઘાલય જેવા સ્થળો પ્રવાસીઓની પસંદગીમાં છે. આ ઉપરાંત ધાર્મિક પ્રવાસન માટે અયોધ્યા, વારાણસી, હરિદ્વાર, રામેશ્વરમ, મદુરાઈ, ચિત્રકૂટ અને જગન્નાથપુરી જેવાં સ્થળો માટે પણ બુકિંગ થઈ રહ્યાં છે.
રાજકોટ ટ્રાવેલ્સ એસોસિયેશનના પ્રમુખ જયેશભાઈ કેસરિયાના જણાવ્યા મુજબ, હવાઈ મુસાફરી મોંઘી બનતાં ઘણા પ્રવાસીઓ ટ્રેન દ્વારા મુસાફરી કરવાનું પસંદ કરી રહ્યા છે. પરિવાર સાથે પ્રવાસ કરતી વખતે મુસાફરી, હોટેલ અને અન્ય ખર્ચને ધ્યાનમાં રાખીને લોકો હવે વધુ આયોજનબદ્ધ રીતે ટૂર નક્કી કરી રહ્યા છે.
ગુજરાતનાં પ્રવાસન સ્થળો પણ આકર્ષણનું કેન્દ્ર
દિવાળીની રજાઓમાં લાંબા પ્રવાસે ન જઈ શકતા લોકો માટે ગુજરાતમાં પણ અનેક વિકલ્પો ઉપલબ્ધ છે. સ્ટેચ્યુ ઓફ યુનિટી, દ્વારકા, સોમનાથ, ગીર, કચ્છનું સફેદ રણ, સાપુતારા અને પાવાગઢ જેવાં સ્થળોએ પરિવાર સાથે ફરવાનું આયોજન કરી શકાય છે. ધાર્મિક સ્થળો, કુદરતી સૌંદર્ય અને ઐતિહાસિક વારસાને કારણે આ સ્થળો પ્રવાસીઓ માટે આકર્ષણનું કેન્દ્ર રહે છે.
કૈંચી ધામ માટે પણ વધી રહ્યો છે રસ
ધાર્મિક પ્રવાસન તરફ લોકોનો ઝુકાવ પણ યથાવત્ છે. ઉત્તરાખંડમાં આવેલું કૈંચી ધામ આ વખતે પ્રવાસીઓમાં ચર્ચાનો વિષય બન્યું છે. ટ્રાવેલ એજન્સીઓના જણાવ્યા મુજબ, ફિલ્મ ‘હનુમાન અંશ’ જોયા બાદ કેટલાક લોકોમાં ધાર્મિક સ્થળોની મુલાકાત લેવાની રુચિ વધી હોવાનું જોવા મળી રહ્યું છે.
દિવાળી નજીક આવતાં ટૂર બુકિંગમાં વધુ વધારો થવાની શક્યતા છે. જોકે, વધતા ખર્ચ અને આંતરરાષ્ટ્રીય પરિસ્થિતિને ધ્યાનમાં રાખીને કેટલાક પ્રવાસીઓ છેલ્લી ઘડી સુધી રાહ જોઈને બુકિંગ કરાવી રહ્યા છે. આ વખતે પ્રવાસીઓ માટે મનપસંદ સ્થળની પસંદગીની સાથે બજેટનું આયોજન પણ એટલું જ મહત્ત્વનું બન્યું છે.
