પરિવાર વતનમાં ધાર્મિક પ્રસંગમાં ગયો હતો ત્યારે તાળું તોડી ઘરમાં ઘૂસ્યા તસ્કરો; ₹8.50 લાખ રોકડા અને સોનાના દાગીના લઈ ફરાર
અમદાવાદના પ્રહલાદનગર વિસ્તારમાં આવેલા આનંદનગર ફ્લેટમાં તસ્કરોએ બંધ મકાનને નિશાન બનાવી ₹11.20 લાખની રોકડ અને સોનાના દાગીનાની ચોરી કરી હતી. પરિવાર વતનમાં ધાર્મિક પ્રસંગમાં ગયો હતો તે દરમિયાન તસ્કરોએ ઘરના દરવાજાનું તાળું તોડી ચોરીને અંજામ આપ્યો હતો. આ અંગે આનંદનગર પોલીસે અજાણ્યા આરોપીઓ સામે ગુનો નોંધી તપાસ શરૂ કરી છે.
પરિવાર પરત ફરતાં ચોરીનો ભાંડો ફૂટ્યો
આનંદનગર ફ્લેટના બ્લોક નંબર 35માં આવેલા મકાન નંબર 205માં રહેતા ઘનશ્યામસિંહ દાયમા 24 ઓક્ટોબરે બપોરે પરિવાર સાથે પોતાના વતન સિમેજ ખાતે માતાજીના ધાર્મિક પ્રસંગમાં ગયા હતા. બીજા દિવસે, 25 ઓક્ટોબરે સાંજે તેઓ ઘરે પરત ફર્યા ત્યારે મુખ્ય દરવાજાનો નકૂચો તૂટેલી હાલતમાં જોવા મળ્યો હતો.
ઘરમાં પ્રવેશીને તપાસ કરતાં સામાન વેરવિખેર પડ્યો હતો અને કબાટ ખુલ્લો હતો. કબાટમાં રાખેલી રોકડ રકમ અને સોનાના દાગીના ગાયબ જણાતાં પરિવારને ચોરીની જાણ થઈ હતી.
નવી કાર માટે રાખેલી રોકડ સહિત દાગીનાની ચોરી
ફરિયાદ મુજબ, મકાનમાંથી નવી કાર ખરીદવા માટે રાખેલા ₹8.50 લાખ રોકડા ચોરાઈ ગયા હતા. આ રકમમાં મકાન વેચાણ, ખેતી અને બચતમાંથી એકત્ર કરેલા નાણાંનો સમાવેશ થતો હતો. આ ઉપરાંત આશરે ત્રણ તોલાની સોનાની લક્કી, જેની કિંમત અંદાજે ₹2.50 લાખ હતી, તેમજ ₹20,000ની કિંમતની સોનાની કાનની ચેઇન પણ તસ્કરો ચોરી ગયા હતા.
આમ, રોકડ અને દાગીના મળીને કુલ ₹11.20 લાખની મતા ચોરાઈ હતી. તસ્કરો એક્સિસ બેંકના લોકરની ચાવી પણ લઈ ગયા હોવાનું ફરિયાદમાં જણાવાયું છે.
આનંદનગર પોલીસે તપાસ શરૂ કરી
ઘટના અંગે ઘનશ્યામસિંહ દાયમાએ આનંદનગર પોલીસ મથકે ફરિયાદ નોંધાવી હતી. પોલીસે અજાણ્યા તસ્કરો સામે ગુનો નોંધી આસપાસના વિસ્તારની તપાસ સહિત આરોપીઓને શોધવા માટે કાર્યવાહી હાથ ધરી છે. બંધ મકાનમાં થયેલી આ ચોરીને પગલે વિસ્તારમાં સુરક્ષા અંગે પણ ચિંતા ઊભી થઈ છે.
