રાજકોટ: શહેરમાં દારૂબંધી વચ્ચે ડુપ્લિકેટ વિદેશી દારૂના કાળા કારોબારનો પર્દાફાશ થયો છે. ભગવતીપરા વિસ્તારમાં સસ્તી વ્હિસ્કીને મોંઘી સ્કોચની બોટલમાં ભરી ઊંચા ભાવે વેચાણ કરતો એક રિક્ષાચાલક પીસીબીના દરોડામાં ઝડપાયો છે.
શહેર પોલીસ કમિશનરના માર્ગદર્શન હેઠળ પીસીબી દ્વારા હાથ ધરાયેલી કાર્યવાહીમાં ભગવતીપરાના વિનોબા ભાવે ટાઉનશિપમાંથી આરોપી **અનિશ આમદભાઈ હિંગોરા (ઉ.વ. 28)**ની ધરપકડ કરવામાં આવી હતી. પોલીસે સ્થળ પરથી વિવિધ બ્રાન્ડની બોટલો, ખાલી સ્કોચની બોટલો, સીલ, હીટ ગન અને અન્ય સાધનો સહિત કુલ ₹11,507નો મુદ્દામાલ જપ્ત કર્યો છે.
પ્રાથમિક તપાસમાં સામે આવ્યું છે કે આરોપી છેલ્લા ચાર મહિનાથી સસ્તી વ્હિસ્કીને મોંઘી બ્રાન્ડની બોટલોમાં ભરી વેચાણ કરતો હતો. તે ઓનલાઈન કેપ અને સીલ મંગાવી હીટ ગનની મદદથી બોટલોને મૂળ જેવી દેખાય તે રીતે પેક કરતો હતો.
પોલીસના જણાવ્યા મુજબ આરોપીએ રિક્ષાનો ધંધો મંદી જતા ઓનલાઈન ₹4 લાખની લોન લીધી હતી. લોનની ભરપાઈ કરવા માટે તેણે આ ગેરકાયદે ધંધો શરૂ કર્યો હોવાનું કબૂલ્યું છે. અંદાજે ₹1 હજારની વ્હિસ્કી સ્કોચ તરીકે ₹6 હજાર સુધીમાં વેચતો હોવાનું પણ તપાસમાં બહાર આવ્યું છે.
આ કેસમાં પોલીસે વધુ તપાસ શરૂ કરી છે અને આ ડુપ્લિકેટ દારૂના નેટવર્કમાં અન્ય કોઈ લોકો સંકળાયેલા છે કે નહીં તે દિશામાં તપાસ આગળ વધારી રહી છે.
