વિશ્વબજારમાં પણ ઐતિહાસિક તેજી; તહેવારોની સિઝન પહેલાં સોના-ચાંદીના ભાવમાં વધુ વધારો થવાની શક્યતા
રાજકોટ: તહેવારોની સિઝન શરૂ થવાના આરે સોના-ચાંદીના બજારમાં તેજીનો નવો દોર જોવા મળી રહ્યો છે. આજે સોનાના ભાવમાં ₹3,300નો જંગી વધારો નોંધાતા રાજકોટમાં 10 ગ્રામ સોનાનો ભાવ વધીને ₹1,53,000 પર પહોંચી ગયો છે.
વિશ્વબજારમાં પણ સોનાના ભાવમાં તેજી યથાવત રહી છે. આંતરરાષ્ટ્રીય બજારમાં સોનાનો ભાવ વધીને 4,272 ડોલર પ્રતિ ઔંસ સુધી પહોંચ્યો છે, જ્યારે સ્થાનિક વાયદા બજારમાં સોનાનો ભાવ ₹1,49,625 નોંધાયો છે.
ચાંદીના બજારમાં પણ મજબૂતી જોવા મળી હતી. રાજકોટમાં હાજર ચાંદીનો ભાવ ₹2,32,500 પ્રતિ કિલો રહ્યો હતો, જ્યારે વાયદા બજારમાં તેનો ભાવ ₹2,27,265 નોંધાયો હતો. આંતરરાષ્ટ્રીય બજારમાં ચાંદી 61.90 ડોલર પ્રતિ ઔંસના સ્તરે કારોબાર કરતી જોવા મળી હતી.
બુલિયન વેપારીઓના જણાવ્યા મુજબ તહેવારોની સિઝન પહેલાં માંગ વધવાની સંભાવના અને વૈશ્વિક બજારમાં સતત વધી રહેલા ભાવને કારણે આગામી દિવસોમાં પણ સોના-ચાંદીમાં તેજીનો ટ્રેન્ડ યથાવત રહેવાની શક્યતા છે.
