રાજ્યમાં વરસાદ ખેંચાતા ઉભી થયેલી પરિસ્થિતિને ધ્યાનમાં રાખીને ગુજરાત સરકારે ખેડૂતો અને પશુપાલકો માટે મહત્વના નિર્ણયો લીધા છે. મુખ્યમંત્રીના માર્ગદર્શન હેઠળ રાજ્ય સરકારે ઘાસચારો, સિંચાઈનું પાણી અને ખેતીવાડી વીજ પુરવઠો વધારવા માટે કામગીરી શરૂ કરી છે. પ્રવક્તા મંત્રી જીતુભાઈ વાઘાણીએ પત્રકાર પરિષદમાં જણાવ્યું હતું કે રાજ્યમાં હાલ ઘાસચારા કે પાણીની અછત નથી અને જરૂરિયાત મુજબ સરકાર તમામ વ્યવસ્થા કરશે.
મંત્રીના જણાવ્યા મુજબ, ઓછા વરસાદની સ્થિતિમાં પશુધનને બચાવવા માટે અત્યાર સુધીમાં રાજ્યના 301 ગામોના આશરે 90 હજાર પશુઓ સુધી 16 લાખ કિલો ઘાસચારો પહોંચાડવામાં આવ્યો છે. પશુપાલકો પર વધારાનો આર્થિક બોજ ન પડે તે માટે માત્ર રૂ.2 પ્રતિ કિલોના રાહત દરે ઘાસચારો આપવામાં આવી રહ્યો છે. વન વિભાગ પાસે હજુ 361 લાખ કિલો ઘાસચારો અનામત હોવાનું જણાવાયું છે અને સ્થાનિક જરૂરિયાત મુજબ તાત્કાલિક વ્યવસ્થા કરવા જિલ્લા કલેક્ટરોને સત્તા આપવામાં આવી છે.
ખાંડના ભાવ અંગે પણ સરકારે સ્થિતિ સ્પષ્ટ કરી છે. મંત્રીના જણાવ્યા મુજબ, ફેક્ટરી બહાર પ્રતિ ક્વિન્ટલ રૂ.6500થી વધુ પહોંચેલા ખાંડના ભાવ હવે ઘટીને રૂ.6000થી નીચે આવ્યા છે. રાજ્યની 17 ખાંડ મિલો પાસે હાલમાં આશરે 18 લાખ ક્વિન્ટલ ખાંડનો જથ્થો ઉપલબ્ધ છે. 15 ઓક્ટોબર બાદ નવી સિઝન શરૂ થતાં ખાંડના ઉત્પાદનમાં વધુ વધારો થવાની શક્યતા છે.
વરસાદની ખેંચને કારણે ખેડૂતોના ઊભા પાકને નુકસાન ન થાય તે માટે સિંચાઈના પાણીની વ્યવસ્થા પણ વધારવામાં આવી રહી છે. સૌની યોજના અને સુજલામ સુફલામ પાઇપલાઇન નેટવર્ક મારફતે નર્મદા આધારિત તળાવો અને ડેમોમાં પાણી ભરવાની કામગીરી શરૂ કરવામાં આવી છે. આણંદ અને ખેડા જિલ્લામાં ઊભા પાકને બચાવવા કડાણા ડેમમાંથી સિંચાઈનું પાણી છોડવાનો નિર્ણય લેવાયો છે. મહી કમાન્ડ વિસ્તારમાં પરિયેજ અને કનેવાલ તળાવમાં પણ પીવાના પાણીની નિયમિત વ્યવસ્થા કરવામાં આવી રહી છે.
ખેતીવાડી વીજ પુરવઠામાં પણ વધારો કરવામાં આવ્યો છે. અમરેલી, કચ્છ, જામનગર, દેવભૂમિ દ્વારકા, ગીર સોમનાથ, પોરબંદર અને જૂનાગઢ એમ કુલ સાત જિલ્લાઓમાં ખેડૂતોને અગાઉના 8 કલાકના બદલે હવે દરરોજ 10 કલાક ગુણવત્તાસભર વીજળી આપવાનું શરૂ કરવામાં આવ્યું છે. અન્ય જિલ્લાઓમાં હાલમાં 8 કલાક વીજ પુરવઠો આપવામાં આવી રહ્યો છે.
સરકારે સ્પષ્ટ કર્યું છે કે જો વરસાદની ખેંચને કારણે અન્ય કોઈ જિલ્લામાં ઊભા પાકને બચાવવા માટે વધારાના વીજ પુરવઠાની જરૂરિયાત ઊભી થશે તો ત્યાં પણ 10 કલાક વીજળી આપવાની વ્યવસ્થા કરવામાં આવશે. આમ, વરસાદની અછત વચ્ચે ખેડૂતો અને પશુપાલકોને રાહત આપવા માટે રાજ્ય સરકારે ઘાસચારો, પાણી અને વીજળી એમ ત્રણેય મોરચે વ્યવસ્થા મજબૂત કરી છે.
