સિસ્ટમ નબળી હોવાથી મોટાભાગના વિસ્તારોમાં હળવાથી સામાન્ય વરસાદ; અમદાવાદ-ગાંધીનગરમાં પણ છૂટાછવાયા ઝાપટાં પડી શકે
અમદાવાદ: ગુજરાતમાં હાલ એકસાથે ત્રણ વરસાદી સિસ્ટમ સક્રિય હોવા છતાં રાજ્યમાં ભારે કે અતિભારે વરસાદની શક્યતા ઓછી છે. હવામાન વૈજ્ઞાનિક રામાશ્રય યાદવના જણાવ્યા મુજબ, સક્રિય સિસ્ટમ્સમાં મજબૂતાઈનો અભાવ હોવાથી આગામી દિવસોમાં મોટાભાગના વિસ્તારોમાં વાદળછાયું વાતાવરણ રહેવાની સાથે હળવાથી સામાન્ય વરસાદી ઝાપટાં પડી શકે છે.
3 સિસ્ટમ સક્રિય, પરંતુ અસર નબળી
રાજ્યમાં એકસાથે ત્રણ વરસાદી સિસ્ટમ સક્રિય છે, પરંતુ તેમાંથી કોઈપણ સિસ્ટમ મજબૂત ન હોવાથી ધોધમાર વરસાદની સ્થિતિ સર્જાય તેવી શક્યતા ઓછી છે. ખાસ કરીને મોટાભાગના વિસ્તારોમાં છૂટોછવાયો વરસાદ અથવા હળવા ઝાપટાં પડવાની સંભાવના છે.
અમદાવાદ-ગાંધીનગરમાં પણ હળવા વરસાદની શક્યતા
અમદાવાદ અને ગાંધીનગરમાં આગામી દિવસોમાં વાદળછાયું વાતાવરણ જોવા મળી શકે છે. આ દરમિયાન શહેરના કેટલાક વિસ્તારોમાં છૂટોછવાયો હળવો વરસાદ થવાની શક્યતા વ્યક્ત કરવામાં આવી છે. જોકે, ભારે વરસાદની સંભાવના હાલ નહિવત્ છે.
રાજ્યમાં હજુ 4 ટકા વરસાદની ઘટ
1 જૂનથી 7 સપ્ટેમ્બર સુધીના વરસાદના આંકડા મુજબ ગુજરાતમાં હજુ પણ 4 ટકા વરસાદની ઘટ નોંધાઈ છે. સપ્ટેમ્બર દરમિયાન હળવાથી સામાન્ય વરસાદ થવાની આગાહી વચ્ચે આગામી દિવસોમાં વરસાદની ઘટમાં કેટલો ઘટાડો થાય છે તેના પર સૌની નજર રહેશે.
