સુરતની પી.પી. સવાણી યુનિવર્સિટીની હોસ્ટેલમાં મેસનું ભોજન લીધા બાદ 100થી વધુ વિદ્યાર્થીઓની તબિયત લથડવાની ઘટના સામે આવ્યા બાદ આરોગ્ય તંત્ર હરકતમાં આવ્યું છે. વિદ્યાર્થીઓને ઝાડા-ઉલ્ટીની તકલીફ થતાં તેમને સારવાર માટે હોસ્પિટલ ખસેડવામાં આવ્યા હતા. ઘટનાને પગલે આજે આરોગ્ય વિભાગની ટીમોએ સુરતની વિવિધ હોસ્પિટલ અને શૈક્ષણિક સંસ્થાઓની મેસમાં ચેકિંગ હાથ ધર્યું હતું.
સિવિલ હોસ્પિટલ, સ્મીમેર હોસ્પિટલ અને SVNITની મેસમાં ભોજનની ગુણવત્તા, ખાદ્ય સામગ્રીનો સંગ્રહ, રસોડાની સ્વચ્છતા અને રાંધેલા ખોરાકની જાળવણી સહિતની વ્યવસ્થાઓ તપાસવામાં આવી હતી. આરોગ્ય વિભાગે મેસ સંચાલકો અને કર્મચારીઓને સ્વચ્છતા જાળવવા તેમજ રાંધેલા ખોરાકને ઢાંકીને રાખવા સહિતની સૂચનાઓ આપી હતી.
પી.પી. સવાણીમાં 100થી વધુ વિદ્યાર્થીઓની તબિયત લથડી
શનિવારે રાત્રે પી.પી. સવાણી યુનિવર્સિટીની હોસ્ટેલમાં મેસનું ભોજન લીધા બાદ 100થી વધુ વિદ્યાર્થીઓને એકસાથે ઝાડા-ઉલ્ટીની તકલીફ શરૂ થઈ હતી. મોટી સંખ્યામાં વિદ્યાર્થીઓની તબિયત લથડતાં તેમને સારવાર માટે હોસ્પિટલ ખસેડવામાં આવ્યા હતા. ઘટનાને પગલે વાલીઓમાં પણ રોષ જોવા મળ્યો હતો.
આ ઘટનાને ગંભીરતાથી લઈ આરોગ્ય વિભાગે શહેરની અન્ય મેસની વ્યવસ્થાની પણ તપાસ કરવાનો નિર્ણય લીધો હતો. જેના ભાગરૂપે આજે સિવિલ, સ્મીમેર અને SVNITની મેસમાં ચેકિંગ હાથ ધરાયું હતું.
સ્મીમેરની મેસમાં કર્મચારીઓ ગ્લોવ્ઝ વગર કામ કરતા જોવા મળ્યા
આરોગ્ય વિભાગની ટીમે સ્મીમેર હોસ્પિટલની મેસમાં ચેકિંગ દરમિયાન કેટલાક કર્મચારીઓ હાથમાં ગ્લોવ્ઝ પહેર્યા વગર કામ કરતા હોવાનું ધ્યાનમાં આવ્યું હતું. ટીમે કર્મચારીઓને ટકોર કરી રસોઈ બનાવતી વખતે તેમજ ભોજન પીરસતી વખતે સ્વચ્છતાના નિયમોનું પાલન કરવા સૂચના આપી હતી.
સિવિલ હોસ્પિટલની મેસમાં પણ સ્વચ્છતાની વ્યવસ્થામાં કેટલીક ખામીઓ જોવા મળી હતી. રસોડું અને મેસ પરિસરમાં નિયમિત સાફ-સફાઈ જાળવવા કર્મચારીઓને તાકીદ કરવામાં આવી હતી. મસાલાના કેટલાક ડબ્બા ખુલ્લા રાખવામાં આવ્યા હોવાનું પણ ધ્યાનમાં આવતાં તમામ ડબ્બા યોગ્ય રીતે બંધ રાખવા સૂચના અપાઈ હતી.
ખાદ્ય સામગ્રી અને રાંધેલા ભોજનને ઢાંકીને રાખવા સૂચના
આરોગ્ય વિભાગની ટીમોએ મેસના રસોડામાં ખાદ્ય સામગ્રી કેવી રીતે સંગ્રહિત કરવામાં આવે છે, રાંધેલા ભોજનને ઢાંકીને રાખવામાં આવે છે કે નહીં, મસાલા સહિતની સામગ્રી યોગ્ય રીતે સંગ્રહિત છે કે નહીં અને રસોડામાં નિયમિત સફાઈ થાય છે કે નહીં તેની તપાસ કરી હતી.
ત્રણેય સ્થળના મેસ સંચાલકો અને કર્મચારીઓને ખાદ્ય સામગ્રી ઢાંકીને રાખવા, રાંધેલું ભોજન ખુલ્લું ન રાખવા અને રસોડામાં સ્વચ્છતા જાળવવા સ્પષ્ટ સૂચનાઓ આપવામાં આવી હતી. પી.પી. સવાણીની ઘટનામાં વિદ્યાર્થીઓની તબિયત લથડવાનું ચોક્કસ કારણ હાલ તપાસનો વિષય છે.
ઘટના બને પછી જ તંત્રને ચેકિંગ યાદ આવે છે?
સુરતમાં કોઈ ગંભીર ઘટના બન્યા બાદ જ તંત્ર દ્વારા મોટા પાયે ચેકિંગ શરૂ કરવામાં આવે છે તેવી સ્થિતિ સામે વારંવાર સવાલો ઊભા થયા છે. તક્ષશિલા અગ્નિકાંડ બાદ શહેરભરના ટ્યુશન ક્લાસમાં ફાયર સેફ્ટીનું ચેકિંગ શરૂ થયું હતું અને અનેક ક્લાસ સામે કાર્યવાહી કરવામાં આવી હતી. ત્યારબાદ પણ આગની વિવિધ ઘટનાઓ બાદ ફાયર વિભાગ દ્વારા ટ્યુશન ક્લાસ, શાળા, હોસ્પિટલ અને હોટલ સહિતના સ્થળોએ તપાસ કરવામાં આવી છે.
આ જ રીતે કોઈ જાહેર સ્થળે આગ કે અન્ય ગંભીર ઘટના બને ત્યારે સલામતી વ્યવસ્થાની તપાસ માટે તંત્ર દોડતું થાય છે. વરાછામાં હોટલના ભોજન બાદ ફૂડ પોઈઝનિંગની ઘટના સામે આવ્યા બાદ પણ શહેરની હોટલ અને રેસ્ટોરન્ટમાં ચેકિંગ કરવામાં આવ્યું હતું.
હવે પી.પી. સવાણી યુનિવર્સિટીની હોસ્ટેલમાં 100થી વધુ વિદ્યાર્થીઓની તબિયત લથડ્યા બાદ શહેરની હોસ્પિટલ અને શૈક્ષણિક સંસ્થાઓની મેસમાં ચેકિંગ શરૂ કરવામાં આવ્યું છે. તપાસ દરમિયાન સ્મીમેરમાં કર્મચારીઓ ગ્લોવ્ઝ વગર કામ કરતા, જ્યારે સિવિલની મેસમાં સ્વચ્છતાનો અભાવ અને ખુલ્લા મસાલાના ડબ્બા જોવા મળ્યા હતા.
ઘટના બાદની તપાસથી ખામીઓ સામે આવે છે, પરંતુ જો આવી તપાસ નિયમિત રીતે થતી રહે તો ગંભીર ઘટના બાદ દોડધામ કરવાની જરૂરિયાત કદાચ ન રહે. હવે સવાલ માત્ર ચેકિંગનો નથી, પરંતુ ‘ઘટના બને તે પહેલાં નિયમિત તપાસ કેમ નહીં?’ તે છે.
