અમદાવાદમાં ભારે વરસાદને પગલે અનેક વિસ્તારોમાં જળબંબાકારની સ્થિતિ સર્જાઈ છે. દરમિયાન બોપલ-શેલા વિસ્તારમાંથી ચિંતાજનક દ્રશ્યો સામે આવ્યા છે. ક્લબ O7 નજીક વરસાદી પાણીમાં એકલવ્ય સ્કૂલની બસ બંધ પડી જતાં તેમાં સવાર નાના બાળકો ફસાઈ ગયા હતા.
પાણીમાં બસ બંધ પડતાં બાળકોમાં અફરાતફરી
મળતી માહિતી મુજબ, એકલવ્ય સ્કૂલની બસમાં પ્રાથમિક શાળાના વિદ્યાર્થીઓ સવાર હતા. ક્લબ O7 નજીક રસ્તા પર ભરાયેલા ઊંડા પાણીમાંથી પસાર થતી વખતે બસ અચાનક બંધ પડી ગઈ હતી. બસ પાણી વચ્ચે અટવાઈ જતાં અંદર બેઠેલા માસૂમ બાળકો ભયભીત થઈ ગયા હતા.
બારીમાંથી હાથ હલાવી બૂમો પાડતા બાળકો
ઘટના સમયે ત્યાંથી પસાર થઈ રહેલા એક સ્થાનિક વ્યક્તિએ સમગ્ર ઘટનાનો વીડિયો મોબાઈલમાં કેદ કર્યો હતો. વીડિયોમાં બાળકો બસની બારીઓમાંથી હાથ હલાવીને મદદ માટે બૂમો પાડતા જોવા મળી રહ્યા છે. ધોધમાર વરસાદના કારણે બાળકો શું કહી રહ્યા હતા તે સ્પષ્ટ સંભળાતું નથી. આ વીડિયો સોશિયલ મીડિયા પર ઝડપથી વાયરલ થઈ રહ્યો છે.
બીજી બસ મોકલી બાળકોનું રેસ્ક્યૂ કરાયું
બસ પાણીમાં ફસાઈ હોવાની જાણ થતાં શાળા સંચાલકો તાત્કાલિક હરકતમાં આવ્યા હતા. ઘટનાસ્થળે બીજી બસ મોકલવામાં આવી હતી અને તમામ બાળકોને સુરક્ષિત રીતે બીજી બસમાં શિફ્ટ કરવામાં આવ્યા હતા. ત્યારબાદ બાળકોને તેમના ઘરે પહોંચાડવાની વ્યવસ્થા કરવામાં આવી હતી.
તમામ બાળકો સુરક્ષિત હોવાની માહિતી મળતાં વાલીઓએ રાહતનો શ્વાસ લીધો હતો. જોકે, ભારે વરસાદ દરમિયાન પાણી ભરાયેલા રસ્તાઓ પરથી સ્કૂલ બસ પસાર કરાવવા અંગે હવે સલામતીને લઈને ગંભીર સવાલો ઊભા થયા છે.
