જામનગરથી અમૃતસરનો 1316 કિ.મી.નો પ્રવાસ 13 કલાકમાં પૂર્ણ થશે; રૂ.80 હજાર કરોડના ખર્ચે હાઈસ્પીડ કનેક્ટિવિટી
અમૃતસરથી જામનગર વચ્ચેનો હાઈવે દેશની હાઈસ્પીડ રોડ કનેક્ટિવિટીને વધુ મજબૂત બનાવશે. આશરે 1316 કિ.મી. લાંબા આ માર્ગથી બંને શહેરો વચ્ચેનો પ્રવાસનો સમય અગાઉના 26 કલાકથી ઘટીને આશરે 13 કલાક થવાની શક્યતા છે.
આ પ્રોજેક્ટથી પંજાબ, હરિયાણા, રાજસ્થાન અને ગુજરાતના 15 શહેરો એકબીજા સાથે જોડાશે. અંદાજે રૂ.80 હજાર કરોડના ખર્ચે વિકસાવવામાં આવી રહેલો સિક્સલેન હાઈવે વેપાર, ઉદ્યોગ અને આંતરરાજ્ય પરિવહન માટે મહત્વપૂર્ણ કનેક્ટિવિટી પૂરી પાડશે.
હાલ અમૃતસરથી જામનગરનું કુલ અંતર આશરે 1430 કિ.મી. છે, જે એક્સપ્રેસવે કનેક્ટિવિટી બાદ ઘટીને 1316 કિ.મી. જેટલું થશે. અગાઉનો મોટો હિસ્સો ટુ-લેન માર્ગ હોવાથી લાંબો સમય લાગતો હતો, જ્યારે નવી સિક્સલેન કનેક્ટિવિટીથી મુસાફરી વધુ ઝડપી બનશે.
આ હાઈવે પંજાબના કપૂરથલા જિલ્લાના ટીમ્બા ગામથી શરૂ થઈને જામનગર નજીક રિલાયન્સ રિફાઈનરી કોમ્પ્લેક્સ પાસે પૂર્ણ થશે. રાજસ્થાનમાંથી પસાર થતો આશરે 637 કિ.મી.નો હિસ્સો પ્રોજેક્ટનો મહત્વપૂર્ણ ભાગ છે અને અહીં બાંધકામ કામગીરી ઝડપથી ચાલી રહી છે.
