15 ઓક્ટોબરથી રૂ.2 હજારથી વધુના પાત્ર વ્યવહારો પર 0.4% MDR; કેશ ટ્રાન્ઝેક્શન વધવાની વેપારીઓને ભીતિ
રાજકોટ: 15 ઓક્ટોબરથી રૂ.2,000થી વધુના પાત્ર UPI મર્ચન્ટ પેમેન્ટ પર 0.4 ટકા મર્ચન્ટ ડિસ્કાઉન્ટ રેટ (MDR) લાગુ થવાના નિર્ણયને લઈને રાજકોટના વેપારીઓમાં ચિંતા જોવા મળી રહી છે. નવા નિયમ મુજબ MDR વેપારી પક્ષે ચૂકવવાનો રહેશે અને ગ્રાહક પાસેથી સીધો વસૂલવાનો નથી. રૂ.75,000 કે તેથી વધુના વ્યવહારમાં MDR મહત્તમ રૂ.300 સુધી મર્યાદિત રહેશે.
રાજકોટના વેપારીઓનું કહેવું છે કે છેલ્લા કેટલાક વર્ષોમાં UPI નાના-મોટા વ્યવહારો માટે સૌથી સરળ પેમેન્ટ માધ્યમ બની ગયું છે. હવે મોટા વ્યવહારો પર MDR લાગતાં વેપારીઓના નફાના માર્જિન પર વધારાનો ખર્ચ આવશે. ખાસ કરીને ઓછા માર્જિનવાળા નાના વેપારીઓ માટે આ ખર્ચ ચિંતાનો વિષય બન્યો છે.
‘ડિજિટલ ટેવ પાડ્યા બાદ ખર્ચ વધશે’
જેમ્સ એન્ડ જ્વેલરી એસોસિએશન રાજકોટના પ્રમુખ મયુર આડેસરાના જણાવ્યા મુજબ, લોકોને ડિજિટલ પેમેન્ટની ટેવ પડી ગયા બાદ હવે વ્યવહાર પર વધારાનો ખર્ચ લાદવાથી વેપાર વધુ જટિલ બનશે. સોની બજારમાં મોટા મૂલ્યના વ્યવહારો સામાન્ય હોવાથી નવા MDRની અસર વધુ અનુભવાઈ શકે છે. વેપારીઓ આ ખર્ચ પોતાના માર્જિનમાંથી સહન કરશે કે અન્ય રીતે તેની ભરપાઈ કરશે તે મહત્વનો પ્રશ્ન છે.
‘ચાર્જ મુલતવી રાખવો જોઈએ’: વી.પી. વૈષ્ણવ
રાજકોટ ચેમ્બર ઓફ કોમર્સ એન્ડ ઇન્ડસ્ટ્રીના પ્રમુખ વી.પી. વૈષ્ણવે UPI પરનો ચાર્જ હાલ પૂરતો મુલતવી રાખવાની માગ કરી છે. તેમના જણાવ્યા મુજબ, તહેવારોની સીઝન શરૂ થવા જઈ રહી છે ત્યારે વેપારીઓ પર વધારાનો ખર્ચ નાખવાથી બજાર પર અસર પડી શકે છે. રોજબરોજના અનેક ડિજિટલ વ્યવહારોનું મોનિટરિંગ અને હિસાબ રાખવો પણ વેપારીઓ માટે પડકારરૂપ બની શકે છે.
ચેમ્બર દ્વારા ચાર્જ લાગુ કરવાની લઘુત્તમ મર્યાદા વધારવા અથવા ચાર્જ વસૂલવાની પ્રક્રિયાને વધુ સરળ બનાવવાની રજૂઆત કરવાની વાત પણ કરવામાં આવી છે.
‘UPI સ્વીકારવાનું બંધ કરવાની સ્થિતિ આવી શકે’: હિતેશ અનડકટ
રાજકોટ હોલસેલ ટેક્સટાઈલ મર્ચન્ટ એસોસિએશનના પ્રમુખ હિતેશ અનડકટએ જણાવ્યું કે નાના વેપારીઓ માટે માર્જિન મર્યાદિત હોય છે. આવા વ્યવહારો પર વધારાનો ખર્ચ સતત વધતો જાય તો કેટલાક વેપારીઓ UPI સ્વીકારવાનું ટાળવાની સ્થિતિમાં આવી શકે છે.
તેમના જણાવ્યા મુજબ, રૂ.2,000ની મર્યાદા આજના રોજિંદા વેપારની દૃષ્ટિએ બહુ મોટી નથી. નાના વેપારીઓમાં પણ દરરોજ મોટી સંખ્યામાં UPI વ્યવહારો થાય છે, તેથી MDRનો સંચિત ખર્ચ નોંધપાત્ર બની શકે છે.
‘કેશ પેમેન્ટ વધવાની શક્યતા’: પ્રણંદ કલ્યાણી
રાજકોટ કલોથ મર્ચન્ટ એસોસિએશનના પ્રમુખ પ્રણંદ કલ્યાણીના જણાવ્યા મુજબ, UPI પેમેન્ટની સરળતાને કારણે ગ્રાહકોમાં ડિજિટલ ચુકવણીની ટેવ પડી છે. નવા ચાર્જથી વેપારીઓ અને ગ્રાહકો બંનેમાં મૂંઝવણ ઊભી થઈ શકે છે અને કેટલાક વ્યવહારોમાં ફરી કેશનો ઉપયોગ વધવાની શક્યતા છે.
તેમણે UPI પર ચાર્જ વગરના વ્યવહારોની મર્યાદા વધારવાની જરૂરિયાત વ્યક્ત કરી હતી.
‘UPIનો ઉપયોગ ઘટી શકે’: પ્રકાશ ગઢિયા
ગુંદાવાડી વેપારીઓ એસોસિએશનના પ્રમુખ પ્રકાશ ગઢિયાના જણાવ્યા મુજબ, બજારમાં મોટી સંખ્યામાં ગ્રાહકો હવે રોકડને બદલે UPIથી ચુકવણી કરે છે. ચાર્જની વ્યવસ્થાથી આ પેમેન્ટ પદ્ધતિના ઉપયોગ પર અસર પડી શકે છે.
તેમણે કહ્યું કે રોકડ સાથે રાખવાની જરૂરિયાત અને સુરક્ષાની ચિંતા સામે UPI ગ્રાહકો માટે સરળ વિકલ્પ બન્યું છે. હવે નવા MDRના કારણે વેપારીઓ પર ખર્ચ વધે તો બજારમાં કેશ અને UPI વચ્ચેના વ્યવહારોનું પ્રમાણ બદલાઈ શકે છે.
દરમિયાન, સરકાર અને NPCIની નવી વ્યવસ્થા મુજબ રૂ.2,000 સુધીના પાત્ર P2M વ્યવહારો તથા વ્યક્તિથી વ્યક્તિના UPI ટ્રાન્સફર પર MDR લાગશે નહીં. નાના વેપારીઓ માટે પણ ચોક્કસ છૂટની જોગવાઈ છે.
