24 કલાકમાં 150 તાલુકામાં વરસાદ; સિઝનનો કુલ વરસાદ 85.79 ટકા, અમદાવાદમાં ભારે વરસાદથી જનજીવન પ્રભાવિત
અમદાવાદ: ચોમાસાની વિદાયના સંકેતો વચ્ચે ગુજરાતમાં ફરી વરસાદી માહોલ જામ્યો છે. અમદાવાદ અને ગાંધીનગર સહિત રાજ્યના અનેક વિસ્તારોમાં વહેલી સવારથી ગાજવીજ સાથે ધોધમાર વરસાદ પડ્યો હતો. અમદાવાદના અનેક નીચાણવાળા વિસ્તારોમાં પાણી ભરાતાં વાહનવ્યવહારને અસર થઈ હતી.
અમદાવાદમાં સવારથી જ કાળા ડિબાંગ વાદળો સાથે વરસાદ શરૂ થયો હતો. શહેરના અનેક વિસ્તારોમાં રસ્તાઓ પર પાણી ભરાઈ ગયા હતા. સરખેજ, નવરંગપુરા, વાસણા સહિતના વિસ્તારોમાં ભારે વરસાદ નોંધાયો હતો. AMCના આંકડા મુજબ સવારે 6થી 10 વાગ્યા દરમિયાન શહેરમાં સરેરાશ 70.33 મીમી વરસાદ નોંધાયો હતો, જ્યારે સરખેજ અર્બન હેલ્થ વિસ્તારમાં 132.50 મીમી એટલે કે 5.22 ઇંચ વરસાદ નોંધાયો હતો.
ભારે વરસાદના કારણે અમદાવાદના અનેક માર્ગો પર ટ્રાફિકજામની સ્થિતિ સર્જાઈ હતી અને નીચાણવાળા વિસ્તારોમાં પાણી ભરાયા હતા. ગાંધીનગરમાં પણ વહેલી સવારથી ગાજવીજ સાથે વરસાદ પડ્યો હતો. હવામાન વિભાગે અમદાવાદ અને ગાંધીનગર સહિતના વિસ્તારોમાં ગાજવીજ સાથે વરસાદની આગાહી કરી છે.
24 કલાકમાં 150 તાલુકામાં મેઘમહેર
સ્ટેટ ઈમરજન્સી ઓપરેશન સેન્ટરના આંકડા મુજબ 17 સપ્ટેમ્બરના સવારે 6 વાગ્યાથી 18 સપ્ટેમ્બરના સવારે 6 વાગ્યા સુધીમાં રાજ્યના 150 તાલુકામાં વરસાદ નોંધાયો હતો. મોરબીના માળિયામાં સૌથી વધુ 131 મીમી એટલે કે 5.16 ઇંચ વરસાદ નોંધાયો હતો.
ઉત્તર ગુજરાતમાં પણ અનેક વિસ્તારોમાં સારો વરસાદ નોંધાયો હતો. દાંતા, બેચરાજી, ખેડબ્રહ્મા, મોડાસા અને દહેગામ સહિતના વિસ્તારોમાં નોંધપાત્ર વરસાદ થયો હતો.
સિઝનનો વરસાદ 85.79 ટકા
ગુજરાતમાં અત્યાર સુધીમાં સિઝનનો સરેરાશ વરસાદ 85.79 ટકા નોંધાયો છે. રાજ્યમાં સામાન્ય રીતે 908.88 મીમી વરસાદની સરખામણીએ અત્યાર સુધીમાં આશરે 779.71 મીમી વરસાદ નોંધાયો છે.
હવામાન વિભાગે આગામી દિવસોમાં પણ ગુજરાતના કેટલાક વિસ્તારોમાં હળવાથી મધ્યમ વરસાદ સાથે ગાજવીજની શક્યતા વ્યક્ત કરી છે.
