ગુજરાતમાં ખેડૂતોને ડિજિટલ ઓળખ અને સરકારી કૃષિ સેવાઓનો સરળ લાભ મળે તે માટે ફાર્મર રજિસ્ટ્રીની કામગીરી આગળ વધી રહી છે. રાજ્યમાં અત્યાર સુધીમાં 63.35 લાખથી વધુ ખેડૂતોએ ફાર્મર રજિસ્ટ્રીમાં નોંધણી કરાવી છે.
ફાર્મર રજિસ્ટ્રી હેઠળ ખેડૂતની આધાર આધારિત ઓળખને જમીનના રેકોર્ડ સાથે જોડવામાં આવે છે અને ચકાસણી બાદ યુનિક ફાર્મર આઈડી આપવામાં આવે છે. આ ડિજિટલ ઓળખના આધારે ખેડૂતોને વિવિધ સરકારી કૃષિ યોજનાઓ અને સેવાઓનો લાભ વધુ સરળતાથી અને પારદર્શક રીતે મળી શકશે.
મહેસૂલ વિભાગના અધિક મુખ્ય સચિવ ડો. જયંતિ એસ. રવિના જણાવ્યા મુજબ, આ પહેલ માત્ર નોંધણી પૂરતી મર્યાદિત નથી, પરંતુ ખેડૂતો અને સરકારની વિવિધ યોજનાઓ તથા કૃષિ સેવાઓ વચ્ચેની પ્રક્રિયાને વધુ સુવ્યવસ્થિત બનાવવાનું કામ કરશે.
કૃષિ મંત્રી જીતુભાઈ વાઘાણીએ જણાવ્યું કે, અગાઉ ખેડૂતોને અલગ-અલગ સરકારી યોજનાઓનો લાભ લેવા માટે વ્યક્તિગત વિગતો, જમીનના દસ્તાવેજો અને પાત્રતાના પુરાવા વારંવાર રજૂ કરવા પડતા હતા. ફાર્મર રજિસ્ટ્રીથી આવી પુનરાવર્તિત પ્રક્રિયા ઘટાડવાનો પ્રયાસ કરવામાં આવી રહ્યો છે.
ખેડૂતો મોબાઇલ ફોન અથવા સરકાર દ્વારા સમર્થિત સેવા કેન્દ્રોની મદદથી ફાર્મર આઈડી માટે નોંધણી કરાવી શકે છે. પ્રક્રિયામાં આધાર ઓથેન્ટિકેશન બાદ ખેડૂત અને તેની જમીનની વિગતોની ચકાસણી કરવામાં આવે છે અને ત્યારબાદ યુનિક ફાર્મર આઈડી જનરેટ કરવામાં આવે છે.
જો નોંધણી દરમિયાન કોઈ જમીનનો સર્વે નંબર રહી જાય તો અપડેટ ફાર્મર રિક્વેસ્ટ (UFR) દ્વારા તેને બાદમાં ઉમેરવાની સુવિધા પણ ઉપલબ્ધ છે.
