જામનગર જિલ્લામાં વરસાદની અછતને કારણે ખેડૂતોના ઉભા પાકને બચાવવા સૌની યોજના મારફતે ડેમોમાં પાણી ભરવામાં આવે અને સિંચાઈની કેનાલોમાં પાણી છોડવામાં આવે તેવી માંગ સાથે જિલ્લા કોંગ્રેસ પ્રમુખ મનોજ કથિરીયાએ કૃષિમંત્રી જીતુ વાઘાણી અને જિલ્લા કલેક્ટર પી.બી. પંડયાને લેખિત રજૂઆત કરી છે.
રજૂઆતમાં તાલુકાવાર વરસાદ, ડેમોની જળસપાટી, પાકની સ્થિતિ અને પાણીની જરૂરિયાત અંગે સત્તાવાર આંકડા જાહેર કરવા તેમજ દુષ્કાળના માપદંડ મુજબ તાત્કાલિક સર્વે કરાવી યોગ્ય નિર્ણય લેવા માંગ કરવામાં આવી છે.
સૌની યોજના સહિત ઉપલબ્ધ જળસ્ત્રોતોમાંથી શક્ય તેટલું પાણી જામનગર જિલ્લાના ડેમોમાં પહોંચાડવામાં આવે અને સિંચાઈ માટે કેનાલોમાં પાણી છોડવામાં આવે, જેથી ખેડૂતોના પાકને જરૂરી પાણી મળી શકે તેવી રજૂઆત કરવામાં આવી છે.
વીજ લાઈન અને થાંભલાની ફરિયાદોનો ઝડપી નિકાલ કરવાની માંગ
ખેતરોમાં ખાનગી વીજ કંપનીઓ દ્વારા વીજ લાઈન નાખવા અને થાંભલા ઉભા કરવા અંગે ખેડૂતોની ફરિયાદો અને વાંધાઓનો પણ રજૂઆતમાં ઉલ્લેખ કરવામાં આવ્યો છે. જમીનમાલિકોના કાયદેસરના અધિકારો, લાગુ પ્રક્રિયા અને વળતર અંગે પારદર્શિતા જાળવવા તેમજ ખેડૂતોની ફરિયાદોના ઝડપી નિકાલ માટે ખાસ વ્યવસ્થા ઉભી કરવાની માંગ કરવામાં આવી છે.
