અમદાવાદ-ભુજ વચ્ચે દોડતી નમો ભારત રેપિડ રેલમાં ટેક્નિકલ ખામી સર્જાવા તેમજ માસિક મેન્ટેનન્સની કામગીરીના કારણે ટ્રેન સેવા એકથી બે દિવસ માટે રદ કરવામાં આવી છે. આ રૂટ પર માત્ર એક જ રેક ઉપલબ્ધ હોવાથી ટેક્નિકલ ખામી કે જાળવણીની જરૂરિયાત ઊભી થાય ત્યારે ટ્રેનનું સંચાલન અટકાવવાની સ્થિતિ સર્જાય છે.
રેલવે પ્રશાસન મુજબ, ટ્રેન નંબર 94801 અમદાવાદ-ભુજ 28 સપ્ટેમ્બર 2026ના રોજ રદ રહેશે. જ્યારે ટ્રેન નંબર 94802 ભુજ-અમદાવાદ 28 અને 29 સપ્ટેમ્બર 2026ના રોજ રદ રહેશે.
ટ્રેન સેવા અચાનક રદ થતાં અગાઉથી બુકિંગ કરાવનારા તેમજ અમદાવાદ અને કચ્છ વચ્ચે મુસાફરીનું આયોજન કરનારા મુસાફરોને હાલાકીનો સામનો કરવો પડી શકે છે. એક જ રેક પર નિર્ભરતા હોવાના કારણે આવી સ્થિતિમાં વૈકલ્પિક ટ્રેન સેવા ઉપલબ્ધ કરાવવી પણ મુશ્કેલ બને છે.
