રાજ્યભરના 8 હજાર મહેસૂલી કર્મચારીઓ સામૂહિક માસ સીએલ પર ઉતર્યા, રેવન્યુ કામગીરી ખોરવાઈ
ગુજરાતમાં લાંબા સમયથી પડતર માંગણીઓનો ઉકેલ ન આવતાં રાજ્યભરના આશરે 8 હજાર મહેસૂલી કર્મચારીઓ સોમવાર, 5 ઓક્ટોબરે સામૂહિક માસ સીએલ પર ઉતરી ગયા છે. રાજકોટ જિલ્લામાં પણ આશરે 450 કર્મચારીઓ આ આંદોલનમાં જોડાતાં મહેસૂલી કામગીરી પર અસર થવાની શક્યતા છે. સરકાર દ્વારા સર્વિસ બ્રેક સહિતની કડક કાર્યવાહી કરવાની ચીમકી આપવામાં આવી હોવા છતાં કર્મચારીઓ પોતાની માગણીઓ પર અડગ રહ્યા છે.
મહેસૂલી કર્મચારી મહામંડળ દ્વારા બઢતી, બદલી, જોબ ચાર્ટ સહિતના આશરે 14 પડતર પ્રશ્નોના ઉકેલની માગણી કરવામાં આવી રહી છે. કર્મચારીઓના જણાવ્યા અનુસાર, આ પ્રશ્નો અંગે રાજ્ય સરકાર સમક્ષ વારંવાર રજૂઆતો કરવામાં આવી હોવા છતાં કોઈ સંતોષકારક નિર્ણય લેવામાં આવ્યો નથી. આથી કર્મચારીઓએ આંદોલનને વધુ ઉગ્ર બનાવવાનો નિર્ણય લીધો છે.
ઉલ્લેખનીય છે કે, જમીન રેકર્ડ વિભાગના વર્ગ-3ના સર્વેયરોની હડતાળ અગાઉથી ચાલી રહી છે. હવે મહેસૂલી કર્મચારીઓ પણ આંદોલનમાં જોડાતાં રાજ્યના મહેસૂલ વિભાગ અને સરકાર વચ્ચે વિવાદ વકર્યો છે. કર્મચારીઓએ અગાઉ કાળી પટ્ટી ધારણ કરીને વિરોધ નોંધાવ્યો હતો તેમજ કચેરીઓનાં વોટ્સએપ ગ્રુપ છોડીને પણ વિરોધ પ્રદર્શિત કર્યો હતો.
બીજી તરફ, સરકારે પણ આ આંદોલનને ગંભીરતાથી લઈને જિલ્લા કલેક્ટરોને કર્મચારીઓની હાજરી સુનિશ્ચિત કરવા સૂચનાઓ આપી છે. માસ સીએલ પર ઉતરનારા કર્મચારીઓ સામે ‘સર્વિસ બ્રેક’ સહિતની વહીવટી અને શિસ્તભંગની કાર્યવાહી કરવાની ચીમકી આપવામાં આવી છે. જોકે, કર્મચારીઓએ સ્પષ્ટ કર્યું છે કે તેઓ અગાઉથી રજાના અહેવાલો આપી ચૂક્યા છે અને પડતર પ્રશ્નોનો ઉકેલ આવે ત્યાં સુધી લડત ચાલુ રાખશે.
7 ઓક્ટોબરથી અચોક્કસ મુદતની હડતાળની ચીમકી
મહેસૂલી કર્મચારી મહામંડળે ચેતવણી આપી છે કે જો સરકાર દ્વારા પડતર પ્રશ્નોનો ઉકેલ લાવવામાં નહીં આવે તો 7 ઓક્ટોબરથી રાજ્યવ્યાપી અચોક્કસ મુદતની હડતાળ શરૂ કરવામાં આવશે. આ સ્થિતિમાં મામલતદાર કચેરીઓ, કલેક્ટર કચેરીઓ અને અન્ય મહેસૂલી વિભાગોની કામગીરી પર વ્યાપક અસર થવાની શક્યતા છે.
મહેસૂલી કર્મચારીઓના આંદોલનને કારણે જમીનને લગતી કામગીરી, વિવિધ પ્રમાણપત્રો, દસ્તાવેજોની પ્રક્રિયા અને અન્ય સરકારી સેવાઓ માટે કચેરીઓમાં આવતા નાગરિકોને મુશ્કેલી પડી શકે છે. હવે સરકાર કર્મચારીઓ સાથે વાટાઘાટ કરીને વિવાદનો ઉકેલ લાવે છે કે આંદોલન વધુ ઉગ્ર બને છે, તેના પર સૌની નજર છે.
