નેશનલ સ્ટેટિસ્ટિક્સ ઓફિસ (NSO)ના ‘હાઉસહોલ્ડ ટ્રાવેલ ઇન ઇન્ડિયા’ સર્વે મુજબ, ગુજરાતમાં રોજિંદી મુસાફરી માટે ટુ-વ્હીલરનો ઉપયોગ કરતા લોકોનું પ્રમાણ રાષ્ટ્રીય સરેરાશ કરતાં વધુ છે. દેશમાં સરેરાશ 32.2 ટકા લોકો બાઇક કે સ્કૂટરનો ઉપયોગ કરે છે, જ્યારે ગુજરાતમાં આ પ્રમાણ 39.7 ટકા છે. ટુ-વ્હીલરના વપરાશમાં ગુજરાત દેશભરમાં નવમા ક્રમે છે, જ્યારે 72.8 ટકા સાથે મિઝોરમ પ્રથમ સ્થાને છે.
સર્વેમાં એ પણ સામે આવ્યું છે કે ગુજરાતમાં કાર અને ઓટોરિક્ષાનો ઉપયોગ પણ રાષ્ટ્રીય સરેરાશ કરતાં વધુ છે. બીજી તરફ, બસ અને સાયકલ જેવા પરિવહનનાં સાધનોનો ઉપયોગ રાષ્ટ્રીય સરેરાશની સરખામણીએ ઓછો છે. આ આંકડા દર્શાવે છે કે રાજ્યમાં શહેરી અને ગ્રામ્ય વિસ્તારોમાં વ્યક્તિગત વાહનો પર લોકોની નિર્ભરતા વધી રહી છે.
મુસાફરીના સમય અંગેના આંકડા મુજબ, ગુજરાતમાં લોકોને કાર્યસ્થળે પહોંચવામાં સરેરાશ 23 મિનિટ, જ્યારે શાળા-કોલેજ સહિતની શિક્ષણ સંસ્થાઓ સુધી પહોંચવામાં સરેરાશ 20 મિનિટ લાગે છે. રાજ્યમાં 87.2 ટકા લોકો 30 મિનિટની અંદર પોતાના કામના સ્થળે પહોંચી જાય છે, જ્યારે 91 ટકા વિદ્યાર્થીઓ અડધા કલાકમાં શાળા કે કોલેજ સુધી પહોંચી જાય છે.
દૈનિક મુસાફરીના ખર્ચની વાત કરીએ તો, ગુજરાતના ગ્રામીણ વિસ્તારોમાં સરેરાશ ખર્ચ રૂ. 738 અને શહેરી વિસ્તારોમાં રૂ. 891 નોંધાયો છે. આ સર્વેના આંકડા રાજ્યમાં પરિવહનનાં સાધનોની પસંદગી, મુસાફરીમાં લાગતો સમય અને ખર્ચ અંગે ચિત્ર રજૂ કરે છે.
