જામનગરના બેડેશ્વર વિસ્તારમાં આવેલી **‘એ-વન બોમ્બે બિરયાની એન્ડ કેટરર્સ’**માંથી નોનવેજ ભોજન આરોગ્યા બાદ 30થી 35 જેટલા લોકોની તબિયત લથડી જતાં ચકચાર મચી છે. ભોજન લીધા બાદ પેટમાં દુખાવો, ઝાડા-ઉલટી સહિતની તકલીફો થતાં અસરગ્રસ્તોને હોસ્પિટલમાં સારવાર માટે ખસેડવામાં આવ્યા હતા. ઘટનાની જાણ થતાં જામનગર મહાનગરપાલિકાના ફૂડ વિભાગે તાત્કાલિક કાર્યવાહી હાથ ધરી કેટરર્સનું રસોડું સીલ કરી દીધું છે.
એકસાથે 35 લોકોની તબિયત લથડી
પ્રાપ્ત વિગતો મુજબ, તા. 4 ઓક્ટોબરની રાત્રે બેડેશ્વર અને આસપાસના વિસ્તારમાં રહેતા 30થી 35 જેટલા લોકોએ આ કેટરર્સમાંથી બિરયાની સહિતની નોનવેજ વાનગીઓ ખરીદીને આરોગી હતી. ત્યારબાદ બીજા દિવસે સવારે એકસાથે અનેક લોકોને પેટમાં દુખાવો, ઝાડા અને ઉલટી જેવી તકલીફો શરૂ થઈ હતી.
તબિયત લથડતાં અસરગ્રસ્તોને સારવાર માટે જામનગરની સરકારી જી.જી. હોસ્પિટલ તેમજ બેડેશ્વરની ખાનગી હોસ્પિટલમાં ખસેડવામાં આવ્યા હતા. સારવાર બાદ તબિયતમાં સુધારો થતાં કેટલાક દર્દીઓને તબક્કાવાર રજા આપવામાં આવી છે. જ્યારે હાલ સરકારી જી.જી. હોસ્પિટલમાં 11 દર્દીઓ સારવાર હેઠળ હોવાનું જાણવા મળ્યું છે અને તેમની તબિયતમાં ધીમે ધીમે સુધારો થઈ રહ્યો છે.
ફૂડ વિભાગની ટીમે સ્થળ પર તપાસ હાથ ધરી
ઘટનાની ગંભીરતાને ધ્યાનમાં રાખીને જામનગર મહાનગરપાલિકાના ફૂડ વિભાગના અધિકારીઓ અને કર્મચારીઓ તાત્કાલિક કેટરર્સના સ્થળે પહોંચ્યા હતા. ટીમ દ્વારા રસોડા સહિત સમગ્ર સ્થળની તપાસ કરવામાં આવતા પ્રાથમિક તબક્કે ભારે અસ્વચ્છ અને અનહાઇજેનિક પરિસ્થિતિ જોવા મળી હતી.
આ સ્થિતિને ધ્યાનમાં રાખીને ફૂડ વિભાગે ‘એ-વન બોમ્બે બિરયાની એન્ડ કેટરર્સ’ને આગામી આદેશ ન થાય ત્યાં સુધી સીલ કરી દીધું છે.
નોનવેજ વાનગીઓના 5 નમૂના લેબોરેટરીમાં મોકલાયા
ફૂડ વિભાગની ટીમે સ્થળ પરથી નોનવેજ વાનગીઓના જુદા જુદા 5 નમૂના પણ જપ્ત કર્યા છે. આ નમૂનાઓને ગુણવત્તા ચકાસણી અને પૃથક્કરણ માટે લેબોરેટરીમાં મોકલવામાં આવ્યા છે.
લેબોરેટરીના રિપોર્ટ બાદ જ ફૂડ પોઈઝનિંગનું ચોક્કસ કારણ જાણી શકાશે. હાલ સમગ્ર મામલે મહાનગરપાલિકાના ફૂડ વિભાગ દ્વારા વધુ તપાસ હાથ ધરવામાં આવી રહી છે.
