અમરેલીઃ અમરેલીના રાજકીય ક્ષેત્રમાંથી દુઃખદ સમાચાર સામે આવ્યા છે. કોંગ્રેસના દિગ્ગજ નેતા અને અમરેલીના પૂર્વ સાંસદ વીરજી ઠુમ્મરનું લાંબી માંદગી બાદ નિધન થયું છે. કેન્સરની બીમારીની સારવાર ચાલી રહી હતી તે દરમિયાન તેમણે અંતિમ શ્વાસ લીધા હતા. તેમના નિધનથી અમરેલી સહિત સમગ્ર ગુજરાતના રાજકીય વર્તુળોમાં શોકની લાગણી પ્રસરી છે.
વીરજી ઠુમ્મરની અંતિમયાત્રા આજે બુધવારે સાંજે 5 વાગ્યે અમરેલીમાં નીકળશે. તેમની અંતિમ વિદાયમાં રાજકીય આગેવાનો, કોંગ્રેસના કાર્યકરો, સમર્થકો અને મોટી સંખ્યામાં શુભેચ્છકો જોડાય તેવી શક્યતા છે.
સંસદથી વિધાનસભા સુધીની નોંધપાત્ર રાજકીય સફર
વીરજી ઠુમ્મરનું નામ અમરેલીના રાજકારણ સાથે લાંબા સમયથી જોડાયેલું રહ્યું હતું. કોંગ્રેસના પ્રભાવશાળી નેતા તરીકે તેમણે સ્થાનિક રાજકારણથી લઈને લોકસભા અને ગુજરાત વિધાનસભા સુધી વિવિધ જવાબદારીઓ નિભાવી હતી.
વર્ષ 2004માં અમરેલી લોકસભા બેઠક પરથી કોંગ્રેસના ઉમેદવાર તરીકે વિજય મેળવીને તેમણે રાષ્ટ્રીય રાજકારણમાં પ્રવેશ કર્યો હતો. આ ચૂંટણીમાં તેમણે ભાજપના નેતા દિલીપ સંઘાણીને હરાવ્યા હતા. ત્યારબાદ તેઓ 2004થી 2009 સુધી લોકસભાના સભ્ય રહ્યા હતા.
લોકસભા બાદ તેમણે ગુજરાતના રાજકારણમાં પણ સક્રિય ભૂમિકા ભજવી હતી. વર્ષ 2017ની ગુજરાત વિધાનસભા ચૂંટણીમાં લાઠી-બાબરા બેઠક પરથી કોંગ્રેસના ઉમેદવાર તરીકે વિજયી બની તેઓ ધારાસભ્ય બન્યા હતા અને 2017થી 2022 સુધી ગુજરાત વિધાનસભાનું પ્રતિનિધિત્વ કર્યું હતું.
વિધાનસભામાં પણ સક્રિય કામગીરી
PRSના રેકોર્ડ મુજબ, વીરજી ઠુમ્મરની વિધાનસભામાં હાજરી 91.5 ટકા રહી હતી. આ દરમિયાન તેમણે અનેક મહત્વપૂર્ણ મુદ્દાઓ પર ચર્ચામાં ભાગ લીધો હતો અને આશરે 120 જેટલી ચર્ચાઓમાં સક્રિય ભાગીદારી નોંધાવી હતી.
ખેડૂત અને જમીન સાથે જોડાયેલી પૃષ્ઠભૂમિ ધરાવતા વીરજી ઠુમ્મર જાહેર જીવનમાં ખેડૂતો અને સામાન્ય લોકોના પ્રશ્નોને મહત્વ આપતા નેતા તરીકે જાણીતા હતા. લાંબા સમય સુધી કોંગ્રેસ સાથે જોડાયેલા રહી તેમણે અમરેલીના રાજકારણમાં પોતાની આગવી ઓળખ ઊભી કરી હતી.
પરિવાર પણ રાજકારણમાં સક્રિય
વીરજી ઠુમ્મરનો રાજકીય વારસો તેમના પરિવાર દ્વારા પણ આગળ વધ્યો છે. તેમની પુત્રી જેની ઠુમ્મર અમરેલીના રાજકારણમાં સક્રિય છે. તેમણે 2015થી 2018 દરમિયાન અમરેલી જિલ્લા પંચાયતના પ્રમુખ તરીકે જવાબદારી સંભાળી હતી. આ ઉપરાંત, વર્ષ 2024ની લોકસભા ચૂંટણીમાં કોંગ્રેસના ઉમેદવાર તરીકે પણ તેમણે ચૂંટણી લડી હતી.
31 મે 1959ના રોજ અમરેલીમાં જન્મ
વીરજી ઠુમ્મરનો જન્મ 31 મે 1959ના રોજ અમરેલીમાં થયો હતો. તેમના પત્નીનું નામ નીલાબેન છે. ખેડૂત અને વ્યવસાયિક પૃષ્ઠભૂમિમાંથી આવતા વીરજી ઠુમ્મરે લાંબા સમય સુધી ભારતીય રાષ્ટ્રીય કોંગ્રેસ સાથે જોડાઈને જાહેર જીવનમાં સક્રિય ભૂમિકા ભજવી હતી.
લોકસભા અને વિધાનસભા બંનેમાં પ્રતિનિધિત્વ કરનાર વીરજી ઠુમ્મરના નિધનથી અમરેલીના રાજકારણમાં એક મહત્વપૂર્ણ અધ્યાયનો અંત આવ્યો છે. તેમના લાંબા રાજકીય જીવન અને જાહેર સેવા સાથે જોડાયેલી યાદો અમરેલીના રાજકીય વર્તુળોમાં લાંબા સમય સુધી સ્મરણમાં રહેશે.
