ગુજરાત ટેક્નોલોજિકલ યુનિવર્સિટી (GTU)ની વિવિધ પરીક્ષાઓમાં ગેરરીતિના કિસ્સા સામે આવ્યા બાદ યુનિવર્સિટીએ કડક કાર્યવાહી કરી છે. પરીક્ષામાં ગેરરીતિ કરતા ઝડપાયેલા 333 વિદ્યાર્થીઓ સામે સજાનો નિર્ણય લેવાયા બાદ હવે સામૂહિક કોપીના કિસ્સામાં રાજકોટ, સુરેન્દ્રનગર, જૂનાગઢ, સુરત અને કડીની પાંચ કોલેજોને કુલ રૂ. 8 લાખનો દંડ ફટકારવામાં આવ્યો છે.
રાજકોટની અર્પિત કોલેજને સૌથી વધુ રૂ. 3 લાખનો દંડ થયો છે. આ ઉપરાંત સુરેન્દ્રનગરની લક્ષ્મણસિંહ વાઘેલા કોલેજને રૂ. 1 લાખ, જૂનાગઢની ધ્રુવી કોલેજને રૂ. 1 લાખ, સુરતની માંડવી એપ્લિકેશન ટ્રસ્ટ સંચાલિત કોલેજને રૂ. 2 લાખ અને કડીની વસુદેવ કોલેજને રૂ. 1 લાખનો દંડ કરવામાં આવ્યો છે.
પરીક્ષાઓ પૂર્ણ થયા બાદ વિવિધ કેન્દ્રોના સીસીટીવી ફૂટેજની તપાસ કરવામાં આવી હતી. જેમાં કેટલાક કેન્દ્રો પર વિદ્યાર્થીઓ ખુલ્લેઆમ એકબીજામાંથી કોપી કરતા હોવાનું સામે આવ્યું હતું. આ દરમિયાન ફરજ પરના નિરીક્ષકો દ્વારા ગેરરીતિ અટકાવવા માટે અસરકારક કાર્યવાહી કરવામાં આવી ન હોવાનું પણ યુનિવર્સિટીની તપાસમાં જણાયું હતું.
સીસીટીવી ફૂટેજના આધારે ચાર પરીક્ષા કેન્દ્રોમાં સામૂહિક ગેરરીતિના કિસ્સા સામે આવતાં સંબંધિત કેન્દ્રોની માન્યતા એક વર્ષ માટે રદ કરવામાં આવી છે. આ સમયગાળા દરમિયાન આ કોલેજોમાં GTUની પરીક્ષાઓ યોજી શકાશે નહીં.
વિદ્યાર્થીઓને અન્ય કેન્દ્રો પર પરીક્ષા આપવી પડશે
પરીક્ષા કેન્દ્ર રદ થતાં સંબંધિત કોલેજોના વિદ્યાર્થીઓએ નજીકની અન્ય કોલેજ અથવા યુનિવર્સિટી દ્વારા ફાળવવામાં આવેલા કેન્દ્ર પર પરીક્ષા આપવી પડશે. જોકે, ગેરરીતિમાં સામેલ ન હોય તેવા વિદ્યાર્થીઓ પર વધારાનો આર્થિક બોજ ન પડે તે માટે GTUએ કોલેજ સંચાલકોને ખાસ સૂચના આપી છે.
સંબંધિત કોલેજોએ વિદ્યાર્થીઓને પરીક્ષા કેન્દ્ર સુધી લઈ જવા અને પરીક્ષા પૂર્ણ થયા બાદ પરત લાવવા માટે વાહનવ્યવસ્થા પોતાના ખર્ચે કરવાની રહેશે. આ માટે વિદ્યાર્થીઓ પાસેથી કોઈ વધારાનો ખર્ચ વસૂલ કરી શકાશે નહીં.
GTUના પરીક્ષા વિભાગના જણાવ્યા મુજબ, વ્યક્તિગત ગેરરીતિના કિસ્સામાં વિદ્યાર્થી સામે કાર્યવાહી કરવામાં આવે છે. જ્યારે કોઈ કેન્દ્ર પર મોટી સંખ્યામાં વિદ્યાર્થીઓ સામૂહિક રીતે કોપી કરતા હોવાનું અને નિરીક્ષકો તેને અટકાવવામાં નિષ્ફળ ગયા હોવાનું સામે આવે ત્યારે પરીક્ષા કેન્દ્રની જવાબદારી પણ નક્કી કરવામાં આવે છે. આ જ આધારે ચાર કેન્દ્ર સામે દંડની સાથે એક વર્ષ માટે પરીક્ષા કેન્દ્ર રદ કરવાની કાર્યવાહી કરવામાં આવી છે.
