સેક્ટર-27 પોલીસ લાઇનમાં ઘટના; સર્વિસ રિવોલ્વરથી ગોળી વાગ્યાની પ્રાથમિક માહિતી, કૌટુંબિક વિવાદની શક્યતાની તપાસ
ગાંધીનગર: ગાંધીનગરમાં પોલીસ બેડાને હચમચાવી નાખતી દુઃખદ ઘટના સામે આવી છે. મુખ્યમંત્રી ભૂપેન્દ્ર પટેલની સુરક્ષામાં ફરજ બજાવતા PSI તન્વીરસિંહ ઝાલાનું સેક્ટર-27 પોલીસ લાઇન ખાતે ગોળી વાગતાં મોત થયું છે. પ્રાથમિક માહિતી મુજબ, તેમણે પોતાની સર્વિસ રિવોલ્વરથી ગોળી મારી આત્મહત્યા કરી હોવાનું અનુમાન છે.
ગોળીનો અવાજ સંભળાતાં સહકર્મીઓ દોડી આવ્યા
પ્રાપ્ત માહિતી અનુસાર, PSI તન્વીરસિંહ ઝાલા ગાંધીનગરના સેક્ટર-27 પોલીસ લાઇનમાં રહેતા હતા અને લાંબા સમયથી ગાંધીનગર ખાતે ફરજ બજાવતા હતા. ઘટનાની જાણ થતાં આસપાસના લોકો અને સહકર્મીઓ સ્થળ પર દોડી ગયા હતા. જોકે, ત્યાં સુધીમાં તેમનું મોત થયું હોવાનું જાણવા મળ્યું છે.
મૃતદેહ પોસ્ટમોર્ટમ માટે ખસેડાયો
ઘટનાની જાણ થતાં પોલીસ દ્વારા જરૂરી કાર્યવાહી હાથ ધરવામાં આવી હતી. મૃતદેહને પોસ્ટમોર્ટમ માટે સિવિલ હોસ્પિટલ ખસેડવામાં આવ્યો હતો. ઘટનાસ્થળેથી પુરાવા એકત્રિત કરવા અને બનાવની હકીકત જાણવા તપાસ શરૂ કરવામાં આવી છે.
કૌટુંબિક વિવાદની શક્યતા અંગે તપાસ
પ્રાથમિક અનુમાન મુજબ, ઘટનાની પાછળ કૌટુંબિક વિવાદ અથવા અંગત કારણો જવાબદાર હોઈ શકે છે. જોકે, આ અંગે સત્તાવાર પુષ્ટિ થઈ નથી. પોલીસ દ્વારા ઘટનાનાં સંજોગો અને અન્ય સંબંધિત પાસાઓની તપાસ કરવામાં આવી રહી છે. તપાસ પૂર્ણ થયા બાદ જ ઘટનાનું ચોક્કસ કારણ સ્પષ્ટ થઈ શકશે.
આ ઘટનાને પગલે પોલીસ વિભાગમાં શોકની લાગણી ફેલાઈ છે.
