મગફળી-કપાસના વાવેતરમાં વધારો; ખરીફ વાવેતર 80%ને પાર
ગાંધીનગર: ગુજરાતમાં ચોમાસાની શરૂઆત મોડી થયા બાદ સમયાંતરે પડી રહેલા વરસાદથી કૃષિક્ષેત્ર માટે સ્થિતિ સુધરતી જોવા મળી રહી છે. રાજ્યના અનેક વિસ્તારોમાં ફરી વરસાદી માહોલ સર્જાતા ખેડૂતોમાં રાહતની લાગણી જોવા મળી છે.
રાજ્યમાં ખરીફ પાકનું કુલ વાવેતર 80 ટકાને પાર થઈ ગયું છે. ક્ષેત્રફળની દૃષ્ટિએ કપાસનું વાવેતર સૌથી વધુ 20.87 લાખ હેક્ટરમાં થયું છે. ગયા વર્ષે 20.35 લાખ હેક્ટરમાં થયેલા વાવેતર કરતાં આ વર્ષે વધારો નોંધાયો છે.
ત્યારબાદ મગફળીનું વાવેતર 19.77 લાખ હેક્ટરમાં થયું છે. આ આંકડો રાજ્યની સરેરાશ 19.15 લાખ હેક્ટરના વાવેતર કરતાં વધુ છે, જોકે ગયા વર્ષના 20.41 લાખ હેક્ટરના આંકડા કરતાં ઓછો છે.
મગફળી અને કપાસ ઉપરાંત સોયાબીન સહિતના મુખ્ય ખરીફ પાકોના વાવેતરમાં પણ સારી સ્થિતિ જોવા મળી રહી છે. વાવેતર મોડું થયું હોવા છતાં સમયાંતરે વરસાદના રાઉન્ડથી પાકને જરૂરી પાણી મળી રહ્યું છે.
હવામાન વિભાગના અનુમાન મુજબ આગામી 13 ઓગસ્ટ સુધી રાજ્યમાં હળવાથી ભારે વરસાદની શક્યતા છે. નવી હવામાન સિસ્ટમ બનવાની શક્યતા વચ્ચે આગામી દિવસોમાં ફરી વરસાદી રાઉન્ડ આવે તેવી સંભાવના છે, જેનાથી ખેતીને વધુ ફાયદો થઈ શકે છે.
