કાગવદર ગામ નજીક PGVCLના ટ્રાન્સફોર્મર પર ચડેલા દીપડાને વીજ કરંટ લાગ્યો
અમરેલી | જાફરાબાદ: અમરેલી જિલ્લાના જાફરાબાદ તાલુકાના કાગવદર ગામ નજીક વીજ કરંટ લાગતાં દીપડાનું મોત નીપજ્યું હોવાની ઘટના સામે આવી છે.
પ્રાથમિક માહિતી મુજબ દીપડો શિકારની શોધમાં PGVCLના ટ્રાન્સફોર્મર પર ચડ્યો હતો. દરમિયાન વીજ કરંટ લાગતાં તેનું ઘટનાસ્થળે જ મોત થયું હતું.
ઘટનાની જાણ થતાં જાફરાબાદ વનવિભાગની ટીમ તેમજ PGVCLના અધિકારીઓ તાત્કાલિક સ્થળ પર પહોંચ્યા હતા. વનવિભાગે મૃત દીપડાને કબજામાં લઈ નિયમ મુજબની કાર્યવાહી હાથ ધરી છે.
દીપડો ટ્રાન્સફોર્મર સુધી કેવી રીતે પહોંચ્યો અને ઘટનામાં વીજ સલામતી સંબંધિત કોઈ બેદરકારી હતી કે કેમ તે અંગે વનવિભાગ તથા PGVCL દ્વારા વધુ તપાસ હાથ ધરવામાં આવી રહી છે.
