અમદાવાદને વૈશ્વિક રમતગમતના નકશા પર મજબૂત સ્થાન અપાવવાના હેતુથી 2030 કોમનવેલ્થ ગેમ્સની યજમાનીની તૈયારીઓ ચાલી રહી છે. આ આયોજનને 2036માં અમદાવાદમાં ઓલિમ્પિક્સ યોજવાના લક્ષ્ય માટેનું ‘ડ્રેસ રિહર્સલ’ માનવામાં આવી રહ્યું છે.
નરેન્દ્ર મોદી સ્ટેડિયમ આસપાસ આશરે રૂ.5,050 કરોડના ખર્ચે સરદાર વલ્લભભાઈ પટેલ સ્પોર્ટ્સ એનક્લેવ વિકસાવવામાં આવી રહ્યું છે. અહીં એક્વાટિક્સ સેન્ટર, ટેનિસ સેન્ટર અને ઇન્ડોર એરેના સહિતની વિશ્વસ્તરીય સુવિધાઓ ઊભી કરવામાં આવશે.
અમદાવાદ અને ગાંધીનગરમાં કુલ 22 સ્પોર્ટ્સ વેન્યુ તૈયાર કરવાની યોજના છે. ગાંધીનગરના કરાઈ ખાતે 50 હજાર દર્શકોની ક્ષમતાવાળું એથ્લેટિક્સ સ્ટેડિયમ અને શૂટિંગ સેન્ટર સહિતનું ઈન્ફ્રાસ્ટ્રક્ચર ડિસેમ્બર 2029 સુધીમાં પૂર્ણ કરવાનો લક્ષ્યાંક છે.
30 મિનિટમાં સ્ટેડિયમ સુધી પહોંચવાનું આયોજન
રમતોત્સવ દરમિયાન ટ્રાફિક વ્યવસ્થા સરળ રહે તે માટે ‘30-મિનિટ સિટી’ મોડેલ અપનાવવામાં આવશે. મેટ્રો, BRTS અને નિયો મેટ્રોને એકબીજા સાથે જોડવામાં આવશે.
આ ઉપરાંત આશરે રૂ.472 કરોડના ખર્ચે એકીકૃત ટિકિટિંગ સિસ્ટમ વિકસાવવામાં આવશે, જેમાં એક જ QR કોડથી મેટ્રો, BRTS અને ઈલેક્ટ્રિક બસોમાં મુસાફરી કરી શકાશે.
ઓલિમ્પિક વિલેજ અને હોટેલ ક્ષમતામાં વધારો
નરેન્દ્ર મોદી સ્ટેડિયમથી આશરે 5 કિલોમીટરના વિસ્તારમાં ઓલિમ્પિક વિલેજ બનાવવાની યોજના છે. તેમાં 2,191 એપાર્ટમેન્ટ્સમાં 17,500થી વધુ ખેલાડીઓ માટે રહેવાની વ્યવસ્થા ઊભી કરવામાં આવશે.
અમદાવાદમાં હાલના આશરે 5,400 સ્ટાર-કેટેગરી રૂમની સંખ્યા વધારીને 2030 સુધીમાં 40,000 કરવાનો લક્ષ્યાંક પણ રાખવામાં આવ્યો છે. જરૂરિયાત મુજબ વડોદરા, સુરત અને ધોલેરાના એરપોર્ટનો પણ ઉપયોગ થઈ શકે છે.
ગ્રીન ગેમ્સ પર ખાસ ભાર
2030ની ગેમ્સને પર્યાવરણને અનુકૂળ બનાવવા માટે સ્પોર્ટ્સ વેન્યુની ઊર્જા જરૂરિયાતમાં રિન્યુએબલ એનર્જીનો ઉપયોગ, પાણીનું 100 ટકા રિસાયક્લિંગ અને આધુનિક બેટરી સ્ટોરેજ સિસ્ટમ જેવી વ્યવસ્થાઓનું આયોજન છે.
ગુજરાતનું સ્પોર્ટ્સ બજેટ પણ વર્ષ 2002ના માત્ર રૂ.2.5 કરોડથી વધીને રૂ.521 કરોડ થયું હોવાનું જણાવાયું છે.
2030 કોમનવેલ્થ ગેમ્સના આયોજન દ્વારા અમદાવાદ વિશ્વસ્તરીય સ્પોર્ટ્સ ઈન્ફ્રાસ્ટ્રક્ચર તૈયાર કરી 2036 ઓલિમ્પિક્સની યજમાની માટે પોતાની ક્ષમતા સાબિત કરવા આગળ વધી રહ્યું છે.
