ભુજમાં પૂર્વ કચ્છ સાયબર ક્રાઈમ પોલીસે ભાડે આપેલા બેંક ખાતા એટલે કે મ્યુલ એકાઉન્ટ્સ મારફતે ચાલતા રૂ.1.33 કરોડથી વધુના સાયબર કૌભાંડનો પર્દાફાશ કર્યો છે. અનધિકૃત ઓનલાઈન ટ્રાન્ઝેક્શન દ્વારા કરવામાં આવેલા આર્થિક કૌભાંડમાં પોલીસે 8 આરોપીઓ સામે ગુનો નોંધી તપાસ હાથ ધરી છે.
પોલીસની પ્રાથમિક તપાસમાં સામે આવ્યું છે કે પાર્થ ચેતન ઝાલા, અધીન ગોવિંદ કાનાણી, વશરામ ઉર્ફે કાળુ કાનાણી, કિશન જગદિશ વાંજા, વકાર હુશેન ડોડા, કુલદિપ ઉર્ફે કિશન બારોટ, વત્સલ ઉર્ફે વિશાલ અનીલ ઠક્કર અને બીટુ રમેશ ઠક્કરે કમિશનની લાલચમાં પોતાના બેંક ખાતાની કિટ અને સિમકાર્ડ અન્ય લોકોને આપ્યા હતા.
આ ખાતાઓનો ઉપયોગ ગેરકાયદેસર નાણાકીય વ્યવહારો માટે કરવામાં આવ્યો હોવાની પોલીસ તપાસમાં માહિતી મળી છે.
બે બેંક ખાતામાંથી રૂ.1.33 કરોડના ટ્રાન્ઝેક્શન
ઊંડાણપૂર્વકની તપાસ દરમિયાન ધી કચ્છ ડિસ્ટ્રિક્ટ સેન્ટ્રલ બેંક, અંજાર શાખાના ખાતામાં રૂ.57,59,438 અને ગુજરાત ગ્રામીણ બેંક, અંજાર શાખાના ખાતામાં રૂ.75,67,940ના અનધિકૃત ઓનલાઈન ટ્રાન્ઝેક્શન થયેલા હોવાનું સામે આવ્યું છે.
બંને ખાતાઓમાં મળીને કુલ રૂ.1,33,27,380ના શંકાસ્પદ ઓનલાઈન નાણાકીય વ્યવહારો મળી આવ્યા છે.
સાયબર ક્રાઈમ પોલીસે ભારતીય ન્યાય સંહિતા અને આઈટી એક્ટની વિવિધ કલમો હેઠળ ગુનો નોંધી આરોપીઓ સામે વધુ કાયદેસરની કાર્યવાહી હાથ ધરી છે.
કમિશનની લાલચમાં બેંક ખાતું કે સિમકાર્ડ અન્યને આપવું ભારે પડી શકે છે—મ્યુલ એકાઉન્ટ સાયબર ગુનામાં વપરાય તો ખાતાધારક પણ કાયદાની ઝપેટમાં આવી શકે છે.
