કાલાવડના હરીપર ગામે ભેળસેળયુક્ત દૂધના કથિત કારોબાર પર દરોડો, 7,150 લીટર દૂધ કબજે
જામનગર જિલ્લાના કાલાવડ તાલુકાના હરીપર ગામે શંકાસ્પદ ભેળસેળયુક્ત દૂધ બનાવવાના કથિત કારોબાર સામે રાજકોટ રેન્જ પોલીસે મોટી કાર્યવાહી હાથ ધરી છે. પોલીસે છ શખ્સોના રહેણાંક મકાનો તથા દૂધની ડેરીઓમાં દરોડા પાડી 7,150 લીટર શંકાસ્પદ દૂધ, 120 કિલો વનસ્પતિ ઘી અને 15 કિલો દૂધ બનાવવાનો પાવડર કબજે કર્યો છે.
રાજકોટ રેન્જના ડીઆઈજી નિર્લિપ્ત રાયની સૂચનાના પગલે રોજિંદા વપરાશની ચીજવસ્તુઓમાં ભેળસેળ કરનારા તત્વો સામે માહિતી એકત્ર કરી ટેકનિકલ એનાલિસિસ હાથ ધરવામાં આવ્યું હતું. મળેલી ચોક્કસ બાતમીના આધારે પીઆઈ સી.એમ. કાંટેલીયા અને સ્ટાફે હરીપર ગામે કાર્યવાહી કરી હતી.
ફૂડ સેફ્ટી વિભાગે સેમ્પલ લીધા
દરોડા દરમિયાન શંકાસ્પદ દૂધ ઉપરાંત મોટી માત્રામાં વનસ્પતિ ઘી અને દૂધ બનાવવાનો પાવડર મળી આવ્યો હતો. પોલીસે ફૂડ સેફ્ટી વિભાગને જાણ કરતાં અધિકારીઓ સ્થળ પર પહોંચ્યા હતા અને દૂધના જરૂરી સેમ્પલ લઈ સ્થળને સીલ કરી દીધું હતું.
રાજકોટ રેન્જની પ્રેસનોટ મુજબ કબજે કરાયેલા શંકાસ્પદ દૂધ, વેજીટેબલ ઘી અને પાવડરનો માનવ સ્વાસ્થ્ય તથા પર્યાવરણને નુકસાન ન થાય તે રીતે નિકાલ કરવામાં આવ્યો હતો.
છ શખ્સોના મકાન-ડેરીમાં તપાસ
પોલીસ કાર્યવાહી દરમિયાન મેરભાઈ વીરાભાઈ ભારાઈ, અરજણભાઈ હમીરભાઈ હણુ, બધાભાઈ બાવનભાઈ ચાવડા, મેરભાઈ બધાભાઈ વંશ, રાણાભાઈ બટુકભાઈ ભારાઈ અને બોધાભાઈ નાથાભાઈ વંશના રહેણાંક મકાનો તથા ડેરીઓમાં તપાસ કરવામાં આવી હતી. તમામ હરીપર, તાલુકો કાલાવડના રહેવાસી હોવાનું પોલીસ દ્વારા જણાવાયું છે.
સમગ્ર મામલે ફૂડ સેફ્ટી ઓફિસર દ્વારા સંબંધિત દૂધના ધંધાર્થીઓ સામે આગળની કાયદેસરની કાર્યવાહી હાથ ધરવામાં આવી છે. જોકે, હાલ કબજે કરાયેલા દૂધને પોલીસ દ્વારા “શંકાસ્પદ ભેળસેળયુક્ત” ગણાવવામાં આવ્યું છે અને સેમ્પલના અંતિમ લેબોરેટરી રિપોર્ટની વિગતો હજુ જાહેર કરવામાં આવી નથી.
You’re on the free plan
