મકાન વેરામાં કોમર્શિયલ જંત્રીદર રૂ.4થી ઘટાડી રૂ.2.50 કરવા રજૂઆત
રાજકોટ મહાનગરપાલિકાના મકાનવેરામાં કોમર્શિયલ મિલકતો માટે લાગુ પડતા જંત્રીદર રૂ.4માંથી ઘટાડીને રૂ.2.50 કરવા માંગણી ઉઠી છે. આ ઉપરાંત વ્યવસાય વેરામાં સિનિયર સિટીઝન માટેની વયમર્યાદા 65 વર્ષથી ઘટાડીને 60 વર્ષ કરવા પણ રજૂઆત કરવામાં આવી છે.
લીંબાસીયા પરિવાર સોશ્યલ ગ્રુપ દ્વારા આ અંગે રાજકોટ મહાનગરપાલિકા સમક્ષ રજૂઆત કરવામાં આવી છે. રજૂઆતમાં જણાવાયું છે કે રાજકોટમાં ડિસેમ્બર 2014માં વોર્ડ નં.12 વાવડી અને વોર્ડ નં.18 કોઠારિયા વિસ્તારોનો સમાવેશ કરવામાં આવ્યો હતો.
2015થી 2020 દરમિયાન આ વિસ્તારોમાં અનેક ઈન્ડસ્ટ્રીઝ વિકસિત થઈ હતી અને કેટલાક ઔદ્યોગિક એકમોને ટેક્સમાં રાહત મળ્યાનો ઉલ્લેખ કરી હવે આસપાસના કોમર્શિયલ યુનિટ્સને પણ રાહત આપવાની માંગ કરવામાં આવી છે.
નવા ભળેલા વિસ્તારોમાં પણ રાહતની માંગ
રાજકોટ મહાનગરપાલિકામાં સમયાંતરે મોટા મવા, માધાપર, મનહરપુર, મુંજકા અને ઈશ્વરિયા સહિતના વિસ્તારોનો સમાવેશ થયો છે. રજૂઆતકર્તાઓના જણાવ્યા મુજબ આવા નવા વિસ્તારોમાં કોમર્શિયલ પ્રવૃત્તિઓ વધી રહી હોવાથી વર્તમાન રૂ.4ના જંત્રીદરને ઘટાડીને રૂ.2.50 કરવાથી મિલકતધારકોને રાહત મળી શકે છે.
વ્યવસાય વેરામાં સિનિયર સિટીઝનની વયમર્યાદા 60 વર્ષ કરવા માંગ
રજૂઆતમાં વધુમાં જણાવાયું છે કે રાજકોટ મહાનગરપાલિકાની સિટી બસમાં સિનિયર સિટીઝન પાસ માટે 60 વર્ષની વયમર્યાદા ગણવામાં આવે છે. આ જ ધોરણે વ્યવસાય વેરામાં પણ સિનિયર સિટીઝન માટેની વયમર્યાદા 65 વર્ષથી ઘટાડીને 60 વર્ષ કરવાની માંગ કરવામાં આવી છે.
લીંબાસીયા પરિવાર સોશ્યલ ગ્રુપના વસંતભાઈ લીંબાસીયાએ બંને મુદ્દે મહાનગરપાલિકા દ્વારા સહકાર આપી યોગ્ય ઉકેલ લાવવામાં આવે તેવી માંગ કરી છે.
