CPની AC ચેમ્બર બહાર નીકળે તો ખબર પડે! પોલીસ જ કાળા કાચ અને નંબર પ્લેટ વગરનાં વાહનોમાં બેફામ
શહેરમાં કાયદો અને વ્યવસ્થા જાળવવાની જવાબદારી ધરાવતી પોલીસ સામે જ નિયમોના ભંગના ગંભીર આક્ષેપો ઉઠ્યા છે. શહેરમાં કેટલાક પોલીસ કર્મચારીઓ અને અધિકારીઓ કાળા કાચ તથા નંબર પ્લેટ વગરનાં ખાનગી અને સરકારી વાહનોનો ઉપયોગ કરતા હોવાનો આક્ષેપ કરવામાં આવ્યો છે.
જો પોલીસ કમિશનર પોતાની એસી ચેમ્બર બહાર નીકળી ગ્રાઉન્ડ પર સરપ્રાઈઝ ચેકિંગ કરે તો પોલીસ ભવનના કેમ્પસથી લઈને વિવિધ પોલીસ સ્ટેશનોના પાર્કિંગમાં જ નિયમ વિરુદ્ધનાં અનેક વાહનો જોવા મળી શકે તેવી ચર્ચા છે.
સામાન્ય જનતા પાસેથી દંડ, પોલીસને કેમ છૂટ?
ટ્રાફિક પોલીસ દ્વારા નિયમોના ભંગ બદલ સામાન્ય વાહનચાલકો પાસેથી દરરોજ દંડ વસૂલવામાં આવે છે. બ્લેક ફિલ્મ, તૂટેલી કે નિયમવિરુદ્ધ નંબર પ્લેટ અથવા ફેન્સી નંબર પ્લેટ હોય તો વાહનચાલક સામે તાત્કાલિક કાર્યવાહી કરવામાં આવે છે.
પરંતુ પોલીસ સ્ટાફના જ વાહનોમાં આવા નિયમભંગ જોવા મળે તો કાર્યવાહી થાય છે કે કેમ તે અંગે સવાલો ઉઠી રહ્યા છે. નિયમો સામાન્ય નાગરિક માટે કડક અને પોલીસ માટે ઢીલા કેમ? તેવો પ્રશ્ન પણ ચર્ચાઈ રહ્યો છે.
કાળા કાચ અને નંબર પ્લેટ વગરનાં વાહનો સામે કાર્યવાહી જરૂરી
વાહનોમાં કાળા કાચ અથવા નિયમવિરુદ્ધ ફિલ્મના ઉપયોગ પર કાયદાકીય નિયંત્રણો છે. નંબર પ્લેટ વગરનું વાહન પણ નિયમવિરુદ્ધ છે. આવી સ્થિતિમાં કાયદાના રક્ષકો જ નિયમોનું પાલન ન કરે તો જનતામાં ખોટો સંદેશ જાય છે.
આથી ઉચ્ચ પોલીસ અધિકારીઓએ સમગ્ર મામલાની ગંભીરતાથી નોંધ લઈ પોલીસ ભવન અને તમામ પોલીસ સ્ટેશનોમાં સરપ્રાઈઝ ચેકિંગ હાથ ધરવું જોઈએ. નિયમોનું ઉલ્લંઘન કરતા પોલીસ કર્મચારીઓ સામે પણ સામાન્ય નાગરિકની જેમ કાયદેસર કાર્યવાહી થાય તેવી માંગ ઉઠી રહી છે.
કાયદો દેશના વડાપ્રધાનથી લઈને સામાન્ય નાગરિક સુધી સૌ માટે સમાન હોવો જોઈએ—તો પોલીસ માટે અલગ નિયમ કેમ?
