સાત વર્ષની સજા પર સ્ટે અને જામીનની અરજી ફગાવાઈ; ‘કાયદાથી મોટું કોઈ નથી’ની કડક ટિપ્પણી
અમદાવાદ: સરકારી કર્મચારીઓ પર હુમલા સહિતના કેસમાં સાત વર્ષની જેલની સજા ભોગવી રહેલા આમ આદમી પાર્ટીના ધારાસભ્ય ચૈતર વસાવાને ગુજરાત હાઈકોર્ટમાંથી મોટો ઝટકો લાગ્યો છે. જસ્ટિસ વિમલ વ્યાસની બેન્ચે તેમની સજા સ્થગિત કરવાની તેમજ જામીન પર મુક્ત કરવાની અરજી ફગાવી દીધી છે.
હાઈકોર્ટે મહત્વપૂર્ણ ટિપ્પણી કરતાં જણાવ્યું કે “કાયદો એ રાજાઓનો રાજા છે અને કાયદાથી મોટું કોઈ નથી.” કોર્ટે નોંધ્યું કે સત્તામાં રહેલા લોકપ્રતિનિધિને આવા ગંભીર કેસમાં રાહત આપવાથી સમાજમાં એવો સંદેશ જઈ શકે છે કે શક્તિશાળી લોકો કાયદાથી ઉપર છે.
જીતેન્દ્ર વસાવાની અરજી પણ નામંજૂર
ચૈતર વસાવા ઉપરાંત તેમના પર્સનલ આસિસ્ટન્ટ જીતેન્દ્ર વસાવાની જામીન અરજી પણ હાઈકોર્ટે ફગાવી છે. કેસમાં કુલ નવ આરોપીઓ પૈકી સાતને જામીન મળ્યા છે, જ્યારે ચૈતર વસાવા અને જીતેન્દ્ર વસાવાને રાહત મળી નથી. હવે ચૈતર વસાવા સુપ્રીમ કોર્ટનો દરવાજો ખખડાવી શકે છે.
2023ના કેસમાં સાત વર્ષની સજા
આ કેસ ઓક્ટોબર-નવેમ્બર 2023 દરમિયાન નર્મદા જિલ્લાના ડેડિયાપાડા તાલુકાના બોગજ ગામ નજીકની ઘટનાને લગતો છે. વન વિભાગ દ્વારા સરકારી વન જમીન પરથી ગેરકાયદેસર અતિક્રમણ અને અનધિકૃત પાક દૂર કરવાની કાર્યવાહી કરવામાં આવી હતી.
પ્રોસિક્યુશન મુજબ, ત્યારબાદ ચૈતર વસાવાએ વન વિભાગના પાંચ કર્મચારીઓને પોતાના નિવાસસ્થાને બોલાવ્યા હતા. ત્યાં ઉગ્ર બોલાચાલી બાદ સરકારી કર્મચારીઓ સાથે ગાળાગાળી અને મારપીટ કરવામાં આવી હોવાનો આરોપ છે. કર્મચારીઓને ડરાવવા માટે હવામાં ગોળીબાર કરવામાં આવ્યો હોવાનો પણ કેસમાં ઉલ્લેખ છે.
લાંબી તપાસ અને ટ્રાયલ બાદ રાજપીપળાની એડિશનલ સેશન્સ કોર્ટે ચૈતર વસાવા, તેમના પત્ની સહિત નવ આરોપીઓને દોષિત ઠેરવ્યા હતા અને ચૈતર વસાવાને સાત વર્ષની સખત કેદ તથા દંડની સજા ફટકારી હતી.
લોકપ્રતિનિધિના વર્તન અંગે પણ કડક ટિપ્પણી
હાઈકોર્ટે જામીન ફગાવતા જાહેર પદ પર રહેલી વ્યક્તિની જવાબદારી અને કાયદાના શાસન પર ભાર મૂક્યો હતો. કોર્ટે અવલોકન કર્યું કે ધારાસભ્ય જેવા જવાબદાર પદે રહેલી વ્યક્તિ પાસેથી કાયદાકીય માર્ગ અપનાવવાની અપેક્ષા હોય છે.
કોર્ટે જનતાનો વિશ્વાસ, ન્યાય પ્રણાલીની ગરિમા અને કાયદાના શાસનને સર્વોચ્ચ મહત્વ આપવાની જરૂરિયાત દર્શાવી હતી. સાથે જ રાજપીપળાની ટ્રાયલ કોર્ટમાંથી કેસના તમામ રેકોર્ડ તાત્કાલિક મંગાવી અપીલની સુનાવણી ઝડપથી પૂર્ણ કરવાનો નિર્દેશ આપ્યો છે.
