નેશનલ સ્ટોક એક્સચેન્જ (NSE)ના તાજેતરના આંકડા મુજબ, જુલાઈ મહિનામાં શેરબજારમાં સક્રિય વ્યક્તિગત રોકાણકારોની સંખ્યામાં ગુજરાતે દેશના મોટા રાજ્યોમાં સૌથી ઝડપી વૃદ્ધિ નોંધાવી છે. માત્ર એક મહિનામાં ગુજરાતમાં સક્રિય રોકાણકારોની સંખ્યા 19.5 ટકા વધીને 19.5 લાખ થઈ છે. આ સાથે દેશના કુલ સક્રિય રોકાણકારોમાં ગુજરાતનો હિસ્સો વધીને 15.2 ટકા થયો છે.
મહારાષ્ટ્ર 20.9 લાખ સક્રિય રોકાણકારો સાથે દેશમાં પ્રથમ ક્રમે છે, પરંતુ જૂનની સરખામણીએ રાજ્યમાં માત્ર 1 ટકાનો વધારો નોંધાયો છે. ઉત્તર પ્રદેશ 11.4 લાખ રોકાણકારો સાથે ત્રીજા સ્થાને છે. ગુજરાત બાદ રાજસ્થાનમાં પણ શેરબજાર પ્રત્યેનો ઉત્સાહ વધ્યો છે અને જુલાઈમાં ત્યાં સક્રિય રોકાણકારોની સંખ્યામાં 14 ટકાનો વધારો થયો છે.
રોકાણકારોની સંખ્યા વધવાની સાથે ગુજરાતમાં શેરોના ખરીદ-વેચાણના કારોબારમાં પણ વધારો થયો છે. જુલાઈમાં ગુજરાતના રોકાણકારોએ રૂ.1.9 લાખ કરોડનું ઇક્વિટી કેશ ટર્નઓવર નોંધાવ્યું હતું, જે જૂનની સરખામણીએ 2.9 ટકા વધુ છે. બીજી તરફ, મહારાષ્ટ્રમાં રૂ.3.4 લાખ કરોડનું ટર્નઓવર થયું હોવા છતાં તેમાં માસિક ધોરણે 2 ટકાનો ઘટાડો નોંધાયો છે.
ગુજરાતની આ વૃદ્ધિમાં અમદાવાદ, સુરત અને રાજકોટ જેવા શહેરોનો મોટો ફાળો રહ્યો છે. અમદાવાદ 4.5 લાખ સક્રિય રોકાણકારો સાથે દેશનાં શહેરોમાં બીજા ક્રમે રહ્યું છે. જ્યારે રાજકોટમાં માત્ર એક જ મહિનામાં સક્રિય રોકાણકારોની સંખ્યામાં 46.2 ટકાનો જંગી વધારો થયો છે અને આ સંખ્યા વધીને 1.9 લાખ થઈ છે.
રાજકોટના આ ઉછાળાને કારણે તેણે દેશના ટોપ-10 શહેરોની યાદીમાં સ્થાન મેળવ્યું છે અને કોલકાતાને પાછળ છોડી દીધું છે. બીજી તરફ સુરતમાં પણ રોકાણકારોની સંખ્યા 23.1 ટકા વધીને 3.2 લાખ થઈ છે. આ આંકડા દર્શાવે છે કે ગુજરાતનાં મોટા શહેરોમાં શેરબજાર પ્રત્યે સામાન્ય લોકોનો રસ ઝડપથી વધી રહ્યો છે.
બજાર નિષ્ણાતોના મતે, અગાઉના મહિનાઓમાં ભૂરાજકીય તણાવ અને વૈશ્વિક અનિશ્ચિતતાના કારણે શેરબજારમાં અસ્થિરતા જોવા મળી હતી. જોકે, બજારમાં સુધારો થતાં રોકાણકારો ફરી સક્રિય બન્યા છે. નવા IPOમાં વધી રહેલો રસ પણ નાના અને મધ્યમ રોકાણકારોને શેરબજાર તરફ આકર્ષી રહ્યો છે.
આ આંકડાઓ એ પણ દર્શાવે છે કે શેરબજારની પહોંચ હવે માત્ર મુંબઈ, દિલ્હી જેવા મોટા મેટ્રો શહેરો પૂરતી મર્યાદિત રહી નથી. નાના શહેરો અને જિલ્લાઓમાં પણ રોકાણકારોની સંખ્યા ઝડપથી વધી રહી છે. જુલાઈમાં દેશના કુલ સક્રિય રોકાણકારોમાંથી આશરે 51 ટકા રોકાણકારો નાના શહેરો અને જિલ્લાઓમાંથી આવ્યા હતા, જે ભારતીય શેરબજારમાં બદલાઈ રહેલી રોકાણની સ્થિતિનો મહત્વપૂર્ણ સંકેત છે.
