અમદાવાદ: અમદાવાદના સરદાર વલ્લભભાઈ પટેલ ઈન્ટરનેશનલ એરપોર્ટ પર એર ઈન્ડિયાની ફ્લાઈટનું ઈમરજન્સી લેન્ડિંગ કરાવવામાં આવતાં અફરાતફરીનો માહોલ સર્જાયો હતો. દમણથી નવી દિલ્હી જઈ રહેલી ફ્લાઈટને બોમ્બ અથવા સુરક્ષા સંબંધિત ધમકી મળ્યા બાદ તાત્કાલિક અમદાવાદ તરફ ડાયવર્ટ કરવામાં આવી હતી.
ધમકીની જાણ થતાં જ અમદાવાદ એરપોર્ટ પ્રશાસન સહિતની સુરક્ષા એજન્સીઓ એલર્ટ મોડ પર આવી ગઈ હતી. ફ્લાઈટનું સુરક્ષિત લેન્ડિંગ કરાવ્યા બાદ તેને આઈસોલેશન બે ખાતે લઈ જવામાં આવી હતી. ત્યારબાદ પ્રોટોકોલ મુજબ તમામ મુસાફરોને સુરક્ષિત રીતે ફ્લાઈટમાંથી બહાર કાઢી વિશેષ બસ મારફતે ટર્મિનલ બિલ્ડિંગમાં ખસેડવામાં આવ્યા હતા.
ઘટનાની ગંભીરતાને ધ્યાનમાં રાખીને એરપોર્ટ પર ફાયર વિભાગની ત્રણ ગાડીઓ તેમજ ઉચ્ચ પોલીસ અધિકારીઓનો કાફલો તૈનાત કરવામાં આવ્યો હતો. BDDS (બોમ્બ ડિસ્પોઝલ સ્ક્વોડ) અને ફાયર વિભાગની ટીમે ફ્લાઈટ ઉપરાંત મુસાફરોના સામાન તથા કાર્ગો એરિયાની પણ સઘન તપાસ હાથ ધરી હતી.
કોઈ શંકાસ્પદ વસ્તુ મળી નહીં
પ્રાથમિક તપાસ દરમિયાન ફ્લાઈટમાંથી કોઈ શંકાસ્પદ કે વાંધાજનક વસ્તુ મળી આવી ન હતી. જેના પગલે સુરક્ષા એજન્સીઓએ રાહતનો શ્વાસ લીધો હતો. જોકે, ધમકી ક્યાંથી આપવામાં આવી અને તેની પાછળનું કારણ શું હતું તે જાણવા માટે સુરક્ષા એજન્સીઓ દ્વારા સાયબર સેલની મદદથી વધુ તપાસ હાથ ધરવામાં આવી છે.
મુસાફરોની સુરક્ષાને ધ્યાનમાં રાખીને અમદાવાદ એરપોર્ટ પર જરૂરી તમામ તકેદારીના પગલાં લેવામાં આવ્યા છે.
