કોંગ્રેસનું નવું સંગઠન તૈયાર : એક સપ્તાહમાં જાહેરાતના સંકેત

વિધાનસભા ચૂંટણી પહેલાં કોંગ્રેસ ‘ઇલેક્શન મોડ’માં : પ્રદેશથી જિલ્લા સ્તર સુધી મોટા ફેરફારની શક્યતા

ગુજરાત વિધાનસભાની ચૂંટણીને હજુ એક વર્ષથી વધુનો સમય બાકી છે ત્યારે કોંગ્રેસે અત્યારથી જ સંગઠનને મજબૂત બનાવી ચૂંટણીની તૈયારીઓ શરૂ કરવાની કવાયત તેજ કરી છે. લાંબા સમયથી અટકેલી પ્રદેશ કોંગ્રેસની નવી સંગઠન રચનાને આખરી ઓપ આપી દેવાયો હોવાના સંકેતો વચ્ચે આગામી એક સપ્તાહમાં નવા સંગઠનની જાહેરાત થઈ શકે છે.

નવા પ્રદેશ સંગઠનમાં પ્રદેશ પ્રમુખ અમિત ચાવડા ઉપરાંત ઉપપ્રમુખ, મહામંત્રી, ખજાનચી, મંત્રી સહિતના હોદ્દેદારોના નામ જાહેર કરવામાં આવશે. સાથે જ રાજ્યના શહેર અને જિલ્લા સંગઠનોમાં પણ મોટા ફેરફારો થવાની શક્યતા છે.

હાઇકમાન્ડ સમક્ષ ગુજરાતનો રિપોર્ટ રજૂ

સંગઠન રચનાની કવાયતના ભાગરૂપે પ્રદેશ કોંગ્રેસ પ્રમુખ અમિત ચાવડા તાજેતરમાં દિલ્હી મુલાકાતે ગયા હતા. અહીં હાઇકમાન્ડ સાથે બેઠક દરમિયાન ગુજરાતમાં પક્ષની સ્થિતિ, સંગઠનની કામગીરી, સ્થાનિક સ્વરાજ્યની ચૂંટણીનાં પરિણામો તેમજ આગેવાનોની કામગીરી અંગેનો રિપોર્ટ રજૂ કરવામાં આવ્યો હોવાનું સૂત્રો જણાવી રહ્યા છે.

આ રિપોર્ટના આધારે ગુજરાતમાં નવા સંગઠનનું માળખું તૈયાર કરવામાં આવ્યું હોવાનું કહેવાય છે. બીજી તરફ કેન્દ્રીય નેતાગીરીએ પણ પોતાના સર્વે અને મળેલા પ્રતિસાદના આધારે સંગઠનમાં જરૂરી ફેરફારો કરવાનો નિર્ણય લીધો હોવાનું જાણવા મળે છે.

યુવા નેતૃત્વને પ્રાધાન્ય

કોંગ્રેસના નવા સંગઠનમાં યુવા નેતૃત્વને વધુ મહત્વ આપવામાં આવે તેવી શક્યતા છે. સૂત્રોના જણાવ્યા અનુસાર મોટાભાગના મહત્વના હોદ્દા 60 વર્ષથી ઓછી વયના આગેવાનોને સોંપવાની વિચારણા છે.

જ્યારે પીઢ અને અનુભવી નેતાઓને સંગઠનમાંથી સંપૂર્ણપણે દૂર કરવાને બદલે માર્ગદર્શક અથવા સલાહકારની ભૂમિકા આપવામાં આવી શકે છે. તાજેતરના વિવિધ આંદોલનો બાદ ગુજરાતની રાજનીતિમાં બદલાતા માહોલને પણ નવા સંગઠનની રચનામાં ધ્યાનમાં લેવામાં આવ્યો હોવાની ચર્ચા છે.

8થી 10 જિલ્લા પ્રમુખ બદલાઈ શકે

પ્રદેશ સંગઠનની સાથે કોંગ્રેસે રાજ્યભરના શહેર અને જિલ્લા સંગઠનોની કામગીરીનું પણ મૂલ્યાંકન કર્યું હોવાનું કહેવાય છે. નબળી કામગીરી જણાઈ હોય તેવા 8થી 10 જિલ્લા પ્રમુખોને બદલવાની શક્યતા છે.

આ ઉપરાંત કેટલાક શહેર પ્રમુખોમાં પણ ફેરફાર કરવામાં આવી શકે છે. આમ પ્રદેશથી લઈને સ્થાનિક સ્તર સુધી સંગઠનમાં વ્યાપક ફેરફાર કરીને ચૂંટણી પહેલાં નવી ટીમ તૈયાર કરવાનો કોંગ્રેસનો વ્યૂહ હોવાનું માનવામાં આવે છે.

ચૂંટણી પહેલાં ટોપથી બોટમ સુધી ફેરફાર

વિધાનસભા ચૂંટણીને ધ્યાનમાં રાખીને પ્રદેશ પ્રમુખ સિવાય સંગઠનના ટોચના હોદ્દાથી લઈને જિલ્લા અને સ્થાનિક સ્તર સુધી ફેરફાર કરવાનો વ્યૂહ અપનાવવામાં આવી રહ્યો છે.

નવા હોદ્દેદારોને પોતાની ટીમ તૈયાર કરવા માટે સમય મળે તે હેતુથી સંગઠનની જાહેરાત વહેલી તકે કરવામાં આવશે. ત્યારબાદ ચૂંટણીલક્ષી કામગીરીને ગતિ આપવામાં આવશે.

વિવિધ સમિતિઓની રચના પણ થશે

નવા સંગઠનની જાહેરાત બાદ કોંગ્રેસ દ્વારા ચૂંટણી તૈયારીના ભાગરૂપે વિવિધ સમિતિઓની રચના સહિતની પ્રક્રિયા પણ ઝડપથી આગળ વધારવામાં આવે તેવી શક્યતા છે.

આ રીતે લાંબા સમયથી અટકેલી સંગઠન રચનાને પૂર્ણ કરીને કોંગ્રેસ હવે આગામી વિધાનસભા ચૂંટણી માટે વહેલી તકે મેદાનમાં ઉતરવાની તૈયારી કરી રહી હોવાનું રાજકીય વર્તુળોમાં ચર્ચાઈ રહ્યું છે.