જૂના ટ્રાન્સફર વ્યવહારોમાં બાકી સ્ટેમ્પ ડ્યુટી અને ભારે પેનલ્ટીના બોજમાંથી પાત્ર MSMEને મળશે રાહત
ગાંધીનગર: GIDCના ઔદ્યોગિક પ્લોટ અને શેડના જૂના તબદીલી વ્યવહારોમાં બાકી રહેલી સ્ટેમ્પ ડ્યુટી તથા તેના પર લાગતી ભારે પેનલ્ટીના કારણે હાલના પ્લોટ ધારકોને મુશ્કેલીનો સામનો કરવો પડતો હતો. ત્યારે રાજ્ય સરકારે પાત્ર MSME ઉદ્યોગોને રાહત આપવા માટે GIDC એમ્નેસ્ટી સ્કીમ અમલમાં મૂકવાનો નિર્ણય કર્યો છે.
GIDCના પ્લોટની અગાઉની તબદીલી વખતે અનેક કિસ્સાઓમાં રજિસ્ટર્ડ લીઝ ડીડ કરવાને બદલે માત્ર એલોટમેન્ટ લેટર, સપ્લીમેન્ટરી એગ્રીમેન્ટ અથવા અન્ય દસ્તાવેજો કરવામાં આવ્યા હતા. પરિણામે અગાઉના વ્યવહારોમાં યોગ્ય સ્ટેમ્પ ડ્યુટી ભરપાઈ થઈ ન હતી.
હવે જ્યારે વર્તમાન પ્લોટ ધારકને લોન લેવા અથવા અન્ય જરૂરી કામ માટે લીઝ ડીડ કરાવવાની જરૂર પડે છે, ત્યારે અગાઉના તમામ વ્યવહારોની બાકી સ્ટેમ્પ ડ્યુટી સાથે ભારે પેનલ્ટી ભરવાની જવાબદારી ઊભી થતી હતી.
સ્ટેમ્પ ડ્યુટી કાયદામાં થયેલા ફેરફાર બાદ મુશ્કેલી વધી
રાજ્ય સરકારે 2 એપ્રિલ, 2025થી ગુજરાત સ્ટેમ્પ અધિનિયમ, 1958માં સુધારા કર્યા હતા. 10 એપ્રિલ, 2025થી અમલમાં આવેલી જોગવાઈ મુજબ સ્વેચ્છાએ દસ્તાવેજ રજૂ કરીને બાકી સ્ટેમ્પ ડ્યુટી ભરવામાં આવે તો ખૂટતી ડ્યુટી પર દર મહિને 2 ટકા સાદું વ્યાજ અને ચાર ગણાથી વધુ નહીં હોય તેટલો દંડ વસૂલવાની જોગવાઈ છે.
જો સરકારી તંત્ર દ્વારા તપાસ દરમિયાન દસ્તાવેજ જપ્ત કરવામાં આવ્યો હોય તો દર મહિને 3 ટકા સાદું વ્યાજ તથા ખૂટતી સ્ટેમ્પ ડ્યુટીના છ ગણાથી વધુ નહીં હોય તેટલો દંડ વસૂલવાની જોગવાઈ છે.
1 જાન્યુઆરી 2018 પહેલાંના વ્યવહારોને પણ 80% રાહત
નવી એમ્નેસ્ટી સ્કીમમાં 1 જાન્યુઆરી, 2018 પહેલાં થયેલા પાત્ર તબદીલી વ્યવહારો માટે વિશેષ રાહતનો પ્રસ્તાવ છે.
આવા કિસ્સામાં અગાઉની તબદીલીઓ પૈકીની છેલ્લી તબદીલીના દસ્તાવેજ પર નક્કી થતી બજાર કિંમતના આધારે લાગતી સ્ટેમ્પ ડ્યુટીમાંથી 80 ટકા રાહત આપવામાં આવશે. એટલે કે માત્ર 20 ટકા સ્ટેમ્પ ડ્યુટી તથા લાગુ પડતી પેનલ્ટી વસૂલવામાં આવશે.
2018 બાદના વ્યવહારોમાં પણ 80% રાહત
1 જાન્યુઆરી, 2018 અથવા ત્યારબાદ થયેલા પાત્ર વ્યવહારોમાં પણ લાગુ પડતી સ્ટેમ્પ ડ્યુટીમાંથી 80 ટકા રાહત આપવાનો પ્રસ્તાવ છે. આવા કિસ્સામાં 20 ટકા સ્ટેમ્પ ડ્યુટી અને લાગુ પેનલ્ટી વસૂલવામાં આવશે.
જોકે, 20 ટકા સ્ટેમ્પ ડ્યુટી અને પેનલ્ટીની કુલ રકમ મૂળ સ્ટેમ્પ ડ્યુટી કરતાં ઓછી થતી હોય તો ઓછામાં ઓછી મૂળ સ્ટેમ્પ ડ્યુટી જેટલી રકમ વસૂલવામાં આવશે.
કોને મળશે યોજનાનો લાભ?
એમ્નેસ્ટી સ્કીમનો લાભ મુખ્યત્વે માન્ય ઉદ્યમ સર્ટિફિકેટ ધરાવતા MSME એકમોને આપવાનો પ્રસ્તાવ છે.
યોજના હેઠળ 30 જૂન, 2025 સુધી થયેલા પાત્ર વ્યવહારોનો સમાવેશ કરવામાં આવશે. તેમાં એલોટમેન્ટ લેટર, શેર ટ્રાન્સફર, ભાડાપટ્ટા, પેટા-ભાડાપટ્ટા તેમજ મિલકતની તબદીલી સાથે જોડાયેલા અન્ય પાત્ર વ્યવહારોનો સમાવેશ થશે.
વર્તમાન માલિકે શું કરવું પડશે?
યોજનાનો લાભ મેળવનાર વર્તમાન ફાળવણીદારે લાગુ પડતી સ્ટેમ્પ ડ્યુટી અને પેનલ્ટીની રકમ ભરવાની રહેશે. સાથે જ સંબંધિત ઔદ્યોગિક પ્લોટ અથવા મિલકતની કાયદેસરની નોંધણી કરાવવી ફરજિયાત રહેશે.
રાજ્યના ઉદ્યોગકારો અને GIDC એસોસિએશન્સ દ્વારા કરવામાં આવેલી રજૂઆતોને ધ્યાનમાં લઈને લેવામાં આવેલા આ નિર્ણયથી જૂના વ્યવહારોના કારણે હાલના પ્લોટ ધારકો પર પડતો ભારે સ્ટેમ્પ ડ્યુટી અને પેનલ્ટીનો બોજ નોંધપાત્ર રીતે હળવો થશે.
આ યોજના એક તરફ MSME ઉદ્યોગોને નાણાકીય રાહત આપશે, તો બીજી તરફ GIDCની મિલકતોના જૂના વ્યવહારોને કાયદેસર અને પારદર્શક નોંધણી વ્યવસ્થામાં લાવવામાં પણ મદદરૂપ બનશે.
